U MP ka Tura ba dei ruh u MLA barim ka Gambegre constituency u Saleng Sangma ula kam ba ka Congress kan jop wat lada kiba don ha ka sorkar ki pyndonkam da ka bor pisa ban pynbiej ia ki paidah ban jop ia ka ilekshon shiteng samoi na Gambegre. “Ym tang ka pisa hynrei pyndonkam ruh da kiwei ki bor sorkar ban jop ia ka ilekshon shiteng samoi ha Gambegre constituency. Nga kmen mynta ki paidbah ki la tip ba lada ki khlaiñ ki lah ban tan ïa u Myntri Rangbah ne ïa u Lamphang ka Iing dorbar sha madan” la ong u Saleng haba jubab ia ka jingkylli, hato ka don ne em ka jingtreikam ka bor pisa ha Gambegre constituency.
U Saleng ula ong, namar ka ilekshon shiteng samoi ha Gambegre constituency ka pynlong ia baroh ki Myntri sorkar ba kin wan hiar sha ki shnong ban lap kiei ki jingduna bad ki jingdonkam ba kyrkieh ban pynbiang ba kin ioh vote.“Baroh ki Myntri Sorkar kynthup u Lamphang ka Iingdorbar ki la hiar da lade sha ki shnong ha Gambegre ban wan pan jingkyrshan na ki paidbah. Ki la ïohi ia ka jingdonkam ki paidbah. Ngi (Congress) rem ne jop ha ka ilekshon shiteng samoi ngam lah ban ong, hynrei la thikna ba ka Congress ka la jop lypa ia ka thong” la ong u Saleng.
Halor ka jingpynkhreh ka Congress ia ka ilekshon, u MP ka Tura ula ong, “Ngam pat ju ïohi ba u Myntri Rangbah ka Jylla un leit ban ialap ilekshon man ki thliew iing wat hapoh ka Constituency lajong ruh um ju leit man ki thliew iing. Hynrei mynta ka kynti namar ba ka kurim jong u ka iakhun ia ka ilekshon shiteng samoi ula leit ialap man ki shnong ne ki jaka kiba um ju dei ban leit ruh”.“Ym dei ka NPP, Congress ne TMC ban jop ia ka ilekshon hynrei dei ki paidbah Gambegre constituency kiba la jop lypa iaka ilekshon shiteng samoi” u la ong. U Saleng ula ong, lada ki nongialam ka NPP ki kynthoh ba ka ri lum Garo ka dang sah dien ki pynjah burom ia kpa lajong u Purno A Sangma uba long u Myntri sorkar pdeng barim bad u Lamphang ka iing dorbar Lok Sabha bad u myntri rangbah ka jylla ha ki snem ba la dep.