U Vice Chancellor (VC) ka skulbah North Eastern Hills University (NEHU), u Prof PS Shukla ula ong ba ym lah ban weng kam ia u Registrar lane Deputy Registrar (Academics) da kaba pynshong nongrim ha ka rai shiliang lane ka jingsngewthuh shimet. U Prof Shukla u la pyntip ba ïa u Registrar, ïa u Deputy Registrar lem bad ïa kiwei ki Ophisar ka skulbah la thung hadien ka jingkhmih bniah bad ka jingïakren ba pura jong ka Committee thungkam.“Ïa ki bynta bad ka jingbteng jong ki ha ka jingshakri la synshar da ki rukom treikam kiba dei, ym da ki rai ba arsap na kano kano ka bor synshar, kynthup ïa u Vice-Chancellor. Kumta kam don jingkylli ban weng ïa kine ki heh” ong u Prof Shukla. Haba iada ia ka nongrim ba ym lah ban wengkam iaki Ophisar, u Prof Shukla u la ong “Ka long kaba kongsan ban tip ba ka jingpynkut kam ia u nongtrei Sorkar kam lah ban jia khlem ki daw kiba biang. Lada ki don shisha ki jingsngewkhia ne ki daw na ka bynta kano kano ka kam kaba kum kane, ka jingtreikam ban wengkam kan sdang shwa da ka jingtohkit, ym da ka jingbeh kam noh mardor”. U VC u la pyntip ba u la ioh jingtip ba ki katto katne ki kynhun ka NEHU kum ka NEHUTA, NEHUNSA bad NEHUSU ki la dep ban phah jingthoh sha ka Sorkar Pdeng ha ryngkat ka jingkynnoh ba don ki kynrum kynram hapoh kane ka skulbah. “Katkum ka jingtip jong nga, ki la dep thoh sha ka President ka ri India bad sha u Myntri ka tnat pule puthi ka Sorkar Pdeng da kaba kynnoh ba ki don ki jingbym iaid beit ha NEHU. Lada ka Sorkar Pdeng ka suba don kano kano ka jingbym iaid beit, ka lah ban thaw ia ka Committee ban tohkit bad ban bishar bniah ia kane ka kam. Hynrei haduh mynta kam pat don kano kano ka jingpyntip na ka ophis jong ka President ne na ka tnad pule puthi ka Sorkar Pdeng ba u VC ka NEHU un shim ia kano kano ka sienjam” u la ong. Ha kaba iadei bad ka jingpyrshah ha kaba thung ia u OSD (Director, College Development Council), u Vice Chancellor u la ong “Nga la iakynduh ia kiba bun ki Professor na ka skulbah ban shim ia katei ka kam, watla katta ruh ym don ba ai ia ka jingmynjur jong ki”.
U Vice Chancellor u la ong ba haduh mynta ka NEHU ka mad ïa ka jingduna ki nongtrei (Non-Teaching) ki bym dei ki nonghikai. U la pyntip ba ïa ki jingpynbna na ka bynta ki kam Non-Teaching la dep pynmih naduh u snem 2023 hynrei ka National Testing Agency (NTA) ka la kyntait ban pynlong ïa ki eksamin thungkam bym dei ki nonghikai. “Ngi la iaid shakhmat ban wad Agency thymmai bad bun tylli ki Agency ki la pyni ia ka jingkwah ban pynlong iaka eksamin thungkam. Shisien ba la plie biang ia ka ophis jong u Registrar kaba la khang namar ki jingiakhih, kine ki File kin iaid shakhmat ban pyntyllung iaki kam ban pynsted iaka jingthungkam thymmai” la ong u Prof Shukla. Halor ka jingdawa ban thung Pro-Vice-Chancellor, u Prof Shukla u la pyntip ba ka skulbah ha ki bun tylli ki khep ka la thoh sha ka tnat Pule Puthi ka Sorkar Pdeng ban ïoh jingshai shuh shuh halor kane ka kam. “Ka NEHU ka dang ap ia ka jubab na ka tnat Pule Puthi ka Sorkar Pdeng. Ngan sa thoh biang sha ka tnat bad lada ym ioh jubab hapoh u bnai Nohprah 2024, ngan thung 2 ngut ki Pro-Vice-Chancellor na ka bynta ka Shillong bad Tura NEHU campus da ki trai jylla” u la bynrap. Ha kajuh ka por, ki samla pule ka skulbah NEHU hapoh ka shatri jong ka NEHU Student Union (NEHUSU) bad ka Khasi Student Union (KSU) NEHU hynne ka sngi kila rai ban bteng beit ban khang khyrdep ia ka skulbah bad ban shah thngan khlem pud sngi tad haduh ba u Prof PS Shukla un hiar shuki noh naka kam Vice Chancellor (VC) jong ka NEHU. Kane ka jingpynbna ki samla pule ka wan hadien ba u VC ka NEHU u PS Shukla u la pynbna ba un nym hiar shuki bad un nym weng kam ïa u Registrar, u Deputy Registrar bad iaki Ophisar ba shah thungkam hapoh kane ka skulbah.
Haba kren sha ki lad pathai khubor, u general secretary ka NEHUSU, u samla Toniho S Kharsati u la ong ba ki samla pule ki la khmih lynti ba ka jingmut kaba bha kan rung sha u VC ha kaba un wengkam noh iaki Ophisar ba thungkam beain hynrei, kane ka long khongpong pynban namar u VC ruh u la pyneh pynkylla. “Ngi skhem ba ngin bteng ia ka jingiakhih jong ngi tad haduh ba ki bor khmih iaka NEHU na Nongbah Delhi kin weng noh ia u VC u bym biang ban khlieh ia kane ka skulbah jong ka Jylla” la ong u samla Toniho. Na ka liang u president ka NEHUSU, u samla Sandy Sohtun u la ong ba kin nym ailad ia ki briew kiba duna kyrdan kum u Registrar, u Colonel (retd) Omkar Singh bad ki Deputy Registrar ba kin sah ha kane ka skulbah. “Ngin nym kynriah nangne tad ka jaka iakhih tad haduh ba u Prof PS Shukla u la shah weng noh kum u VC ka NEHU” la ong u samla Sandy.