Ka Lyngngam Presbyterian College Mawthengkut hynne ka sngi ka 6 tarik u Naiwieng kala rakhe ïa ka Graduation Day kaba 3 jong ka College da kaba pynkup burom ïa ki 57 ngut ki samla pule kiba la pyndep ia ki jingpule na katei ka College kiba dei ruh ki batch jong u snem 2020-21. Ha katei ka sngi ka College kala sam ruh ïa ki jingai sngewbha sha baroh 57 ngut ki samla pule kiba la pyndep ïa ka graduate ha kaba u MLA ka Mawshynrut Constituency u bah Methodius Dkhar u la long kum u kongsan ban sam ïa kitei ki jingai sngewbha ha ryngkat ka jingïadonlang ruh u Bah M.A Challam SDO ka Mawshynrut Civil Sub Division kum u symbud kongsan.
U Kongsan haba ai jingkren ha katei ka jingïalang u la kyntu ïa ki samla pule katei ka College kiba la pyndep ïa ka graduate ba kin pyrkhat bad sngewnguh ïa kita kiba la noh synniang ha ka jingim jong ki naduh ba dang kha haduh kane ka khyllipmat kat haduh ba kin da ïoh phong ïa ka pansngiat graduation. U la pynpaw ruh ba jingjop kam dei tang ha ka jingïoh spah ne ha ka jingioh ia ki kyrdan ba kham shalor, hynrei, ka dei ha ka jinglah ban lehbha ha kano kano ka kam ba phi jied, kata la ka dei ha ka kam rep, ka kam shna ïing shna sem, ne kano kano ka kam kaba ïahap bad ka sap jong u briew.
Kiba la ïadonlang ha katei ka sngi ki kynthup u Rev. A. Nongbri President Governing Body, Rev. Dr. B.K Shangpliang Secretary Governing Body, Rev. J. Nongdkhar, Rev. R.S Diengdoh, Rev. Dr. P.R Marthong, ki nonghikai ki kmie kpa bad kiwei kiwei kiba la shah khot sngewbha.