Ki bor ka NITI Aayog ka sorkar pdeng ha ka 6 tarik Naiwieng ki la plie ia ka prokram kaba 15 sngi ba la tip kum ka Jal Utsav kaban phaikhmat ban pynshai paidbah halor ka jingkordor bad ka jingdonkam ban pynneh pynsah ia ki tyllong um ha kylleng ki jaka jong ka them Ri Bhoi kaba dei kawei na ki Aspirational District, ia kane ka programme la sdang ha ka Water Treatment Plant jong ka tnad PHE ha Iewmawlong. Ia ka Jal Utsav programme la iatreilang da ka tnad NITI Aayog lem bad ka tnad PHE, ka Ophis u BDO ka Umling C& RD Block bad kiwei kiwei. La wan ban plie ia kane ka program da u Deputy Commissioner ka Ri Bhoi District u Abhilash Baranwal kum u kongsan, ha ka jingiadonlang ruh ka Iffat Parvin, Consultant ka NITI Aayog, u Bah M.B Tongper ADC bad SDO Patharkhmah, lem bad kisid kiwei ki ophisar, ki khynnah skul bad ki nongshong shnong ka Iewmawlong.
Haba kren ha kane ka program, u Abhilash Baranwal, kum u khlieh ka district, u la pynshai ba ia kane ka program Jal Utsav kaba dei ka thong jong ka sorkar pdeng ban pyniaid da ka NITI Aayog hadien ka jingiohi jngai jong u Myntri Rangbah duh ka Ri u Narendra Modi ban sumar ia ki tyllong umbam umdih ban iada na ki jingeh na ka jingtyrkhong ne ka jingduh noh ki tyllong um ha ki snem ban wan. la iathuh, ba ka um ka long kaba kongsan bha ha ka jingim briew hynrei kumba long mynta bun ki tyllong um ki la sdang ring bad tyrkhong na kiba bun ki daw kaba lah ban wanrah ia ka jingma na ka jingkyrduh kaba shyrkhei, kumta ka long kaba kongsan ba u wei pa u wei u nongshong shnong lem ki khynnah skul ban shim jingkitkhlieh ban iada ia ki tyllong um da kaba pynkhuid bad pynneh pynsah ia ki kaba dei ka thong jong ka Jal Utsav.
Ha kine ki 15 sngi ba ka program jong ka Jal Utsav kan long kin don ki programme bapher bapher ha kylleng ki shnong ka district naduh ka jingiaid pynsngewthuh paidbah, ki jingiakob thoh slogan, ka marathon ba 7 kilometre bad ka jingleit pynshai hapoh ki jaka sumar pang paidbah kum ki CHC, PHC bad dispensary.