Rakhe ka JJM ban pynneh pynsah ïa ki tyllong um ha Ri Bhoi District

Ka ophis u Deputy Commissioner ka Ri Bhoi District ha ryngkat ka Jal Jeevan Mission ha ka jingiatreilang bad kiwei kiwei ki tnad treikam Sorkar mynta ka sngi ka la ioh ban pynwai noh ia ka programme jong ka Jal Utsav ban pynsngewthuh ia ka jingdonkam ban iada ia ka um bam umdih, ka jingkhmih bniah ia ka um hapoh ka NITI Aayog kaba la jied ia ki 20 tylli ki Aspirational District ban pynlong ia kane ka program, la pynwai ia kane ka programme ha Parish Hall jong ka St. Paul Higher Secondary School Nongpoh. Ki tnad treikam kiba la don bynta ban pynlong ia kane ka program ki kynthup ia ka PHE, Umling C&RD Block, DSEO, DMHO, DSWCO, Water Resources, Sports, ki kynhun SHG’s bad kiwei kiwei. Ha kane ka sngi ba la pynwai ia ka Jal Utsav Campaign, la wan ban ia shimbynta da u Myntri ka tnad PHE u Marcuise N. Marak, u Abhilash Baranwal, Deputy Commissioner, ka Kong B. Lyndem Chief Engineer PHE Shillong, u Bah U. Kurbah EE PHE Nongpoh, ki khynnah skul, Nonghikai bad ki nongialam shnong, nongialam jong ki kynhun SHg bad kiwei.

U Abhilash Baranwal, DC ka district, haba pynshai halor kane ka jingiaid lynti jong ka program Jal Utsav jong ka NITI Aayog, kaba la jied ia ki 20 Aspirational District kaba la sdang naduh ka 6 tarik haduh 20 tarik Naiwieng 2024 da ka jingiatreilang bad ka Jal Jeevan Mission bad kiwei kiwei ki tnad na bynta ban pynsngewthuh paidbah na bynta ban iada bad sumar ia ka umbam umdih. U la ong ruh, ba ha kine ki ar taiew kum ka tnad treikam sorkar ka la pynlong ia shibun ki programme ban ai jinghikai bad ban pynshai ia ka jingthmu bad ka thong jong ka Jal Utsav ha kaba ia dei bad ka jinglong kongsan ban sumar ia ka um bam umdih na bynta kawei pat kawei ka longiing longsem hapoh ka ri India hi baroh kawei. Haba kren kum u kongsan, u Marcuise N. Marak u la pynpaw ia ka jingkmen ban ia don bynta lang ha kane ka program pynwai ia ka jingrakhe ia ka jinglong kongsan ka um hapoh ka Aspirational District jong ka Ri Bhoi District, da kaba ai khublei ruh ia ka sorkar pdeng kaba la jied ia ka Ri Bhoi District kum kawei ka District kaban ioh ia ka jingmyntoi kaba khraw lyngba ki program hapoh ka NITI Aayog.

U la ai ruh ia ka jingiaroh, halor ka jingtreishitom jong baroh kiba la don bynta ban pynjop ia kane ka Jal Utsav programme naduh ki tnat treikam sorkar, ki kynhun nongialam shnong, ki kynhun SHGs, ki nonghikai bad khynnah skul kiba la long shisha kita ki nongpynsaphriang ia ka khubor halor ki jingiada bad pynneh pynsah ia ki tyllong umbam umdih, ka jingkhmieh bniah ia ka um bad kiwei. Ha kane ka sngi, la pynlong ruh ia ka jingbam smai jong ka Jal Utsav, ka jingsam ia ki khusnam sha ki nongjop ha ki jingiakop bapher bapher, bad ruh ka jingsam ia ki tiar khmieh bniah ia ka um ba la sam lyngba ka Jal Jeevan Mission sha ki nongioh bhah na ka shnong Iewmawlong, Mawdiangum, Pahamsyiem, Umlyngkdait and Shangbangla.