Yn shna Hostel na bynta kiba duna dkhot met ha Aphatha Society

Hynne ka sngi ha ka jingialang kynmaw burom ia ka sngi ba kyrpang jong ki briew ba don jingduna dkhot met kaba tip kum ka International Day of Person with Disability ha phyllaw ka Aphatha Society ha Dkhiah West, East Jaiñtia Hills District kaba dei ka seng ba peit kyrpang na ka bynta ki briew ba duna dkhot met, u Deputy Commissioner ka East Jaiñtia Hills u Shivansh Awasthi ula plie ruh ia u maw nongrim na ka bynta ban shna hostel khnang ba kiba duna dkhot met ba wan na ki jaka ba jngai ban pyndep shah hikai  bapher bapher kin ioh jaka sah. Kane ka jingiarap dei lyngba ka District Mineral Fund Scheme (DMF) jong u snem 2024-2025 bad la mang ban shna 3 kamra ryngkat ki paiñkhana naka bynta ki kynthei bad shynrang. Ha kane ka sngi nalor u Deputy Commissioner la donlang ruh u DSP East Jaiñtia Hills District u Spearsing Pasleiñ kum u symbud kongsan, ka Basuk Kharbihthai, Secretary DLSA East Jaiñtia Hills bad kiwei haka jingialang ba pyniaid daka Melody War Legal Adviser Aphatha Society. Kumba ka phang jong kane ka sngi ka ong “Applying the leadership of persons with Disabilities for an inclusive and sustainable future”  ka Basuk Kharbihthai, Secretary DLSA East Jaiñtia Hills  kala pynkynmaw  ia kiba duna dkhot met ba kim dei ban duh mynsiem namar ba maki ruh ki don ka juh ka hok ban mih shakhmat ha kano kano ka kam  haka imlang sahlang katkum ka bor jinglah jongki la ban long nongialam ha kano kano ka bynta ne wat ban long nongmihkhmat.

Nangta ka la pynshai ruh sha kiba duna dkhot ba lyngba ka District Legal Services Authority ki lah ruh ban ioh iaka jingiarap ba kyrpang kiba iadei bad ka aiñ khlem kano kano ka jingsiew.  U DSP Spearsing Pasleiñ haba iaroh iaki kam ka Ephatha Society u kyrmen ba kan nanglah trei bha nangne shakhmat naka bynta ki para briew, da kaba u kyntu ruh ba kan lum kan lang shuh shuh ia kum kine ki briew naka bynta ban pynioh ki lad jingiarap ne awareness bapher bapher. U pyntip ruh sha kiba duna dkhot met ba maki kum ka tnat pulit ruh ki long la kloi ban iarap iaki haba ki wan mih pan jingiarap. Na ka liang u kongsan Deputy Commissioner haba kren u ong,  ka sorkar kmie kumjuh ka sorkar Jylla kala ialeh ban wad ki lad ki lynti halor ban pynbha  shuh shuh iaka hok ka rukom im ki briew ba don jingduna la haba iadei bad ka bhah iohkam iohjam, ka bhah pule puthi bad kumjuh ruh ka jingpynshitom iaki briew ba ban beiñ ka kiba duna dkhot met. Bad kaba kongsan tam u ong, dei ka jingwanrah jingkylla haka jingmut jingpyrkhat u paidbah bad ka sorkar naka bynta ki briew ba don jingduna kata ka long, ym ban peit iaki kum kita ki briew ba don jingduna hynrei kum ki briew ba don iaka jinglah ba kham pher, namar watla kim biang dkhot met kumba long lem kiba bun ba lang ruh hynrei ki lah pat ban leh kaei kaei kaba kyrpang.

Kumta donkam ban ithuh bad pdiang ba uno uno u don ka bynta ba kyrpang, bad ban ai mynsiem ia kaei ka sap ne jinglong kyrpang ba u don. Kumba kane dei ka jingsdang jong ki bor District East Jaiñtia ban iatreilang bad ka Ephatha Society u kyrmen nangne shakhmat yn nanglah shuh shuh ban kyntiew ia kane ka Society naka bynta ka jingmyntoi ki briew ba duna dkhot met. Ha kane ka sngi ka Aphatha Society kala ai jingiarap ruh daki Wheal Chair sha kiba duna dkhot met kiba shem shitom ban iaid ban ieng.