Iakynduh ka HPC, kyrmen ban ioh pynlong Dorbar Mang Tyngka ha IingDorbar thymmai

U Lamphang ka ïingdorbar thawain ka Jylla u Thomas A. Sangma hynne ka sngi ula khot ka jingialang jong ka High-Power Committee (HPC) ban peit halor ka jingtei ia ka ïingdorbar thawain thymmai ha Mawdiangdiang, Shillong. U Thomas A. Sangma ula pyntip ba ka jingbuh thong ban pyndep ia ka ïingdorbar thymmai la hap ban pynjlan por bad la buh thong ban plie noh ha shwa ban pynlong ia ka Dorbar Synrai ha u snem ban wan.  “Ka jingialang ka High-Power Committee ka la shimkhia bad ngi lah shim ki katto katne ki rai ban pyniaid beit ki kam shakhmat ban pyndep kloi bad phikir namar ka jingtei kyrpang ia ka Dome ha ka Main Hall. Kam don kano kano ka jingpynwan dur ba iasyriem kumjuh ha ki bynta jong kane ka ri. Kam long ban leh kyrkieh ioh ka jia biang sa shisien kum ha ki por ba la dep” la ong u Thomas Sangma hadien ba lawai ka jingialang jong ka High-Power Committee (HPC).

 U Lamphang ula ong, “U Structural Engineer ula don ban pynthikna ka jingtrei kan long kaba biang. Ngi kyrmen skhem ban ioh pynlong ia ka Dorbar Mang Tyngka ha u snem ban wan, hynrei sngewsih ka kam ka dang sahteng bad kyrmen yn pyndep ha shwa ban sdang ka Dorbar Synrai u snem 2025”.   Katba u Myntri Rangbah ka Jylla ula ong, “Ki kam ki la iaid bha shakhmat hynrei ngi hap ban mad ia ki jingtynjuh. Ki Engineer na ka Public Works Department (PWD), Project Management Consultant (PMC) bad ki Contractor ki la pynlong bun sien ia ka jingpeit bniah. Ka HPC ka la mynjur ban pynjlan sa 100 sngi bad kane ka la buh ha ka jingeh ban pynlong ia ka Dorbar Mang Tyngka kumba la buh thong mynshwa. Hynrei ngi kyrmen ba ka projek yn pyndep shwa ka Dorbar Synrai u snem 2025”.

 “Ka jingshna ia ka Dome ba khia 3,000 Metric Ton mynshwa la pynsangeh, bad mynta la pynwan dur thymmai ia ka Dome kynthup ia ka jingpynieng ia ki paia, la pynduna noh ka jingkhia sha ka 85 Metric Ton. Ka jingpynkylla ban oh dur thymmai kan long ka jingshngain haba don ki jingkhyniuh jumai ne ka jingtuid ka um slap” la ong u Myntri Rangbah. Ha ka jingialang la donlang u Myntri Rangbah ka jylla u Conrad K. Sangma, u Symbud Lamphang ka ïingdorbar thawaiñ u Timothy D. Shira, ki Symbud Myntri Rangbah ka jylla u Bah Prestone Tynsong bad u Bah Sniawbhalang Dhar, ki MLA kynthup ia u Bah Charles Pyngrope, Bah Lahkmen Rymbui bad u Bah Banteidor Lyngdoh, u Chief Secretary ka jylla u Bah D.P. Wahlang bad ki ophisar ka sorkar ka jylla.