Hiar jurip kynsan ka Central PollutionControl Board ïa ka wah Myntdu

Ki heh ka Central Pollution Control Board, Regional Directorate (North East) ryngkat u Dr. H. Tyngsong, Scientist- NE Regional Office ka Ministry of Environment, Forest & Climate Change ka sorkar India lem bad u S. Syiem, Environment Engineer ka Meghalaya State Pollution Control Board, Shillong haka 13/12/24 kala hiar tohkit kyndit kynsan halor ka jingshah ktah ka Wah Myntdu ha ki bynta ba shna ia u surok thymmai Jowai Bypass ba pyniasoh na treïongriang ha Khliehtyrshi. La ong ba na ka jingpyntrei ia une u surok Bypass thymmai kane ka wah mynta kala ring sdod ring swai naka daw ba dap ka ktien bad khyndew, kaba la ktah ruh wat iaka umbam umdih ba sam da ka tnat PHE sha man ki rympei ïing ka shnong Jowai nalor ba shah pynjulor ruh ki pynthor kba ba don harud ka wah Myntdu. Ha kane ka jingwan hiar tohkit kine ki heh kila leit peit iaka jaka bret khyndew ka PWD kaba tuid shaki wah duid Pamkam bad sha Myntdu, kila jurip ruh iaka jaka ba shah khlong maw khlong khyndew ka wah Mynkrem wah Myntdu, bad lap ruh iaka jingtan um u Contractor na wah Mynkrem ba shna ia une u sarok.

Nangta la tohkit ruh iaki nala ba tuid shaka wah Myntdu bala shna daka Jowai Municipal Board katkum ka hukum ka NGT. Haba ki leit peit iaki jaka bret khyndew ki lap tang khyndiat eh wat haba ka jingshna ia u surok kala palat iaka 5 Km ka jingjrong bad 25 mtrs ka jingiar kynring. Ki pan ruh na ka ophis u EE PWD (Rds) Jowai Division iaki kot ba iadei halor ka jingioh bor jong ki ban ot iaki deing, ban ah ia u lum bad ban tih iaki maw siang surok. Hadien kane kila leit sa sha Oorkhla Khimusniang ka jaka ba pynkhuid um ka tnat PHE shwa ban sam shaki paidbah bad shim nuksa ruh iaka um naka bynta ban test.

Haba iadei bad ka jinglap jingshem jong ki baroh na kane ka jingwan tohkit kin sa phah ka NGT. Ha kane ka jingwan tohkit la donlang ka B. Blah, ADC, u H. Nengnong, EE PWD (Rds) Jowai Division, u O. Thubru, AEE, u R. Challam SDO (E) PHE, Jowai Sub-Division, Jowai, u Manager ka M/s DCC ryngkat ka jingsakhi lang u Khroo L Pariat, President Khooid Ya Ka Wah Myntdu bad ki riew ryngbah ka shnong Jowai kiba la iakhun lang ban pynneh pynbha iaka Myntdu.