Lap ka kynhun iaid kjat ia ka krem bret briew bad ki jaka ba itynnad ha Hima Langiong

Ka kynhun ba iaid kjat kynthup naduh Shillong, Upper Shillong bad kiwei ha shuwa ban pdiang ia u snem thymmai ha ka 28 tarik u Nohprah, 2024 ka la pynlong ka jingiaid kjat na Phanñiewlah Rum haduh ka jaka ba khot ka Waiñtali ka la sakhi ia ki jaka ba itynnad ha katei ka thaiñ. Ka kynhun ka la lap ia ka krem ba ju tip kum ka krem bret briew ha jaka ba khot Dam Waiñtali kaba don ia ka khana ba ha ki por naduh hyndai ba la ju bret ia ki riew sniew ba ju pynwit ia ka imlang sahlang. Ia kane ka kynhun ki riew ieit mariang kiba thrang ruh ban kyntiew ia ki kam jngohkai pyrthei la ialam da u Bah Staising Kharbteng ha ka jingdon ryngkat u Bah Ailand Swer uba long u Myntri ka Hima Lyngiong Lyngdohship ha ka jingdon ryngkat ki samla, ki longkmie bad riew rangbah.

Na ka liang u Bah Staising Kharbteng ula pynpaw ba kane ka jingiaid trekking ka dei kaba la iaid ruh ha ki snem ba la dep ha ka jingdon u Lyngdoh ka Lyngiong Lyngdohship bad ki riew rangbah da ka jingthmu ban pyni paidbah ia ka jingitynnad ha kitei ki bynta. U Bah Ailand Swer ula ong ba bun ki nongleit nongwan na ka thaiñ jong ki lehse kim tip ia ka mariang ba itynnad ha kine ki bynta ba don na shalyndet ka surok kaba ki lah ban sakhi da la ki jong ki khmat lada ki poi sha kitei ki jaka. U Bah Escommanding Marbaniang u trai shnong na Mawngap Lumparing ula ong ba ka dei ka sien banyngkong ba u poi sha kine ki jaka bad sakhi da la ki jong ki khmat ia ka jinglong kyrpang ka jaka ha ka jingitynnad.

U Bah Tried Shangpliang, u Bah Shaitbor Kharmih bad kiwei kiwei kiba donlang ha kane ka sngi ki la pynpaw ba kum ki trai shnong ki don ka jingthrang ba ka kam jngohkai pyrthei ha kane ka thaiñ kan kiew bad kyntu ia ki bor sorkar ban phaikhmat ha kane ka bynta bad kyrmen ba lyngba kane ka pynpaw pyrthei ia ka jingitynnad ka mariang ha ka thaiñ bad kan iarap ia ka jingthrang kum ki trai shnong ban kyntiew ia ka kam shangkai pyrthei.