Ban wanrah jingïatylli para Khasi, ka mat ïalap ilekshon bah Seibor

U Bah Seibor L. Nonglait, u kyrtong ban iakhun ia ka ilekshon MDC kum u kyrtong shimet u la pynpaw ba u la mih shakhmat ban ialap ia ka ilekshon da ka jingieit bad ban wanrah ia ka jingiatylli para Khasi ym da ka jingkdew kti. U Bah Seibor, u ba dei u President barim bad banyngkong ka seng TULBA, u pynpaw ba dei ma u uba nyngkong tam ha Meghalaya ban pynbna ban ia khun MDC na Mawlai konstitwensi naduh 16 tarik u Jymmang 2023. U ong ruh ba u kwah symbol da  dohnud bad u ong ba ka jingthrang jong u ban long u nongshakri paidbah, ka dei naduh ka por ba u dang dap 18 snem ka rta, kumta u la ap ia kane lad ka ka kabu ban ia khun ia kane ka ilekshon haduh 27 snem. Ka jingthmu jong u ka long ban ioh shakri hok met bad mynsiem ia u paidbah  Mawlai bad ia ka Bri Hynniewtrep hynriew skum.

U la rai naduh ba sdang ba yn nym ia khun na ka kano kano ka party namar u don la ka jong ka ideology. U pynpaw ba dei ma u ba la rung nyngkong eh sha ki shnong ki thaw jong baroh kawei ka shnong mawlai. ka jingthmu jong u ban leit sha ka Khasi Hills Autonomous District Council ka dei ban leit da jingpynbha ia  ki ain ba la don lypa. U pynpaw ba ka jingkwah ka dei ban pynneh pynsah ia ki lai tylli ki maw byrsiew jong ka jaitbynriew, nyngkong ia ki Riti ki dustur, ka ri kaba ju bna ka ri kaba shong suk shong ka sain, ka ri  jong ka burom ka akor, ba ar ban iada ia ki khyndew ka shyiap,  ki khlaw ki btap bad ba lai ban teh lakam ia ka khaii ka pateng, ka iew duh ka ba ju dei ka pliang jong u  trai ri trai muluk .(ka Trading by Non Tribals Regulation 1954).

U Bah Seibor u pynpaw ba un dawa bad iakhun ba ka Sorkar pdeng kan ithuh ia ka ktien khasi ha ka khyrnit ba phra (haba im ka ktien im ka jaitbynriew) bad ka jingdawa Inner Line Permit,  Bengal Eastern Frontier Regulation Act of 1873, ka jingweng noh ka paragraph 12A (a) na ka Sixth Schedule namar ka jingbsut ia ka Paragraph 12A( a) ha ka Sixth Schedule ha u snem 1971 ka nang pyntlot bor shuhs shuh ia ki ADC.