Pynkhreh ka Sorkar ia ka DPR thymmai ban pyniasoh bad ka ISBT Mawiong

U Myntri Rangbah ka Jylla u Conrad K Sangma ula pynksan ba ka Sorkar kam lah ban khein sting halor ka jinglong shngain ka Jingkieng Dam Umiam ba dang shu dep maramot shen. Kane ka wan hadien ka jinud jingnam ki paidbah kiba pyndonkam ia ka Inter State Bus Terminus (ISBT) kaba don ha Mawiong. Lah ban kdew ba ki Bor District ki la khang syndon ia ki kali heh khamtam ki Bos ban kiew sha Shillong ban kit bad pynhiar briew ha ISBT. Haba kren sha ki lad pathai khubor u Myntri Rangbah ka Jylla u Conrad K Sangma ula ong, “Hoid nga sngewthuh ia ka jingud jingnam ki paidbah kiba pyndonkam ia ka ISBT hynrei kane baroh ka dei namar ba ka long kaba kongsan tam ban pynneh ia ka jinglong shngain ka Jingkieng Dam Umiam”.

U Conrad ula ong, ba ka jingkhang ia ki kali heh khamtam ia ki Bos ban iaid nalor ka Jingkieng Dam kam dei ba ka Sorkar ka leh khnang hynrei ka dei ban iada ia ka Dam. “Ngi hap ban khang namar kane ka jingpyrkhing ban iaid kali heh na ka Jingkieng ka long ban pynneh ia ka Jingkieng kaba pyniasoh ia ka Nongbah Shillong bad kiwei ki District khamtam ka Ri-bhoi District” u la ong.

Haba kylli halor ki sienjam ba ka Sorkar ka shim ban pyntreikam kam biang ia ka ISBT ha Mawiong, u Conrad u la ong “Ngi dang wad ban shna surok thymmai ba ki Bos kin iaid ban poi sha ISBT”. “Ka jingpynkhreh ia ka Detailed Project Work (DPR) ka dang iaid shakhmat” u la ong.