Ha u Dharmendra phah tuklar ka NEHUNSA ban pynbeit ïa ki kynrum kynram ha NEHU

Ka North EasterN Hill University Non-Teaching Staff Association (NEHUNSA) ka la phah da ka jingthoh sha u Myntri ka Sorkar Pdeng uba peit ia ka pule puthi Dharmendra Pradhan, ban tuklar lem mardor ha kaban pynbeit noh ia ki kynrum kynram kiba la sahteng hapoh jong ka skulbah NEHU.”Da ka jingsngewkhia kaba jur ha kaba iadei bad ka jinglong jingman ha ka skulbah North-Eastern Hill University, sa shisien ka NEHUNSA kala phah ia ka jingthoh sha u Myntri ka sorkar pdeng ba un wad ia ki lad ki lynti ban pynbeit noh ia ka kynrum kynram ha NEHU. Ba la seng ia ka NEHU ban ai iaka jinghikai ha ki kyrdan kiba heh na ka bynta ki paidbah ka thain. Ka jingthmu ka long ban kyntiew ia ka thain bad ia ka rukom im, ka ban kyntiew ia ka jylla bad ia ka ri ruh” la pynpaw u President ka NEHUNSA u Dr Wandondor Rynjah Synrem ha kyrwoh khubor.

U Bah Synrem ula pynpaw ba ka Non-Teaching Employees jongka University ka don ia ka bynta kaba khraw ha ka jingpyniaid ia ki kam jong ka skulbah khamtam haba ki nongtrei ki bym dei ki nonghikai, ki dei kiba donbynta ha ka jingpdiang ia ka jingwan pule ne Admission jongki samla pule, ban rejistar ia ki samla pule, ban pynkhreh ia ka Scholarship/Fellowship, ban pynlong ia ki eksamin bad kiwei kiwei. Ki kam ki jam kiba man la ka sngi jong ki nongtrei bad ki nonghikai kadei ruh ka kam kaba pynpeit da ki nongtrei ki bym dei ki nonghikai. U Dr Synrem ula pynpaw, kumba la kdew ha ka shithi kaba la phah nyngkong, ka kam jong ki nongtrei ki bym dei nonghikai kala hiar bha kaba la poi shaduh uta u pud ba kala ktah ia ka jingtreikam kaba man la ka sngi ha ka skulbah.

“Ngi lah dep kdew ruh, ba lah dep ban ai ia ka jingpynbna ha kaba iadei bad ki kam nonghikai kiba lait hynrei kala don pat ka jingsahteng ha ka jingthungkam” la pynpaw u nongialam ka NEHUNSA bad ka kyntu ia u Myntri ka Sorkar Pdeng ban bthah ia u Acting Vice Chancellor ban pyndap noh ia kitei ki kam kiba lait thylli ha ka University.”U Acting Vice-Chancellor ym shim la bat ia kano kano ka kyrdan ha ka jingialang jongka Executive Council kaba dei kaba kongsan bha, na ka bynta ki jingpynbna laitkam nonghikai kiba dei ban pyndap noh mardor. Kum ki dkhot kiba don ia ka jingsngewkhia, ngi kyrpad ba phin bthah ia u Acting Vice Chancellor ban leh noh ia kaba donkam” la pynkut u nongialam ka NEHUNSA.