Leit jurip kam pynroi ka Myntri Sorkar Pdeng kylleng ka Jylla

Ha ka jingthmu ban pynkhlain ia ka jingpyntreikam ia ki prokram Sorkar kiba donkam bad ban bishar bniah ia ki projek pynroi, ka Myntri Sorkar Pdeng ba khmih iaka tnat Consumer Affairs, Food, and Public Distribution ka Nimuben J Bambhaniya ka la leit jngoh ïa ki katto katne ki jaka treikam ba kongsan ha kylleng ka Jylla Meghalaya. Ka jingleit jong ka Myntri ka kynthup ïa ka jingleit jurip ban lum jingtip iaki kam pynroi ba kynthup haka liang Public Welfare, ka koit ka khiah, Food Distribution Systems, Rural Employment bad Housing. Ka Rynjah State Dispensary: Ka Nimuben J Bambhaniya ka la sdang ïa ka jingleit jngoh jong ka ha Rynjah State Dispensary, ha kaba ka la ïakynduh bad ki nongtrei ka koit ka khiah ba kynthup ïa ki doktor bad ki nurse. Ka Myntri Sorkar Pdeng kala bishar bniah ia ka jingshakri ba la ai sha ki nongshong shnong, khamtam kito kiba na ki jaka ba marjan. Ka la ban jur ia ka jingdonkam ban bteng ia ka jingpyrshang ban pynbha ia ki jingtei bad ki jingshakri ha ka koit ka khiah, ban pynthikna ia ka jingbha jingmiat jong baroh ki nongshong shnong. Ka Anapurti Grain ATM: Ka Myntri Sorkar Pdeng kala leit jurip ia ka ATM Anapurti Grain kaba don ha ka dukan Fair Price kaba don ha Rynjah RR Colony. Kane ka rukom sam khaw kaba thymmai kaba la pyntreikam da ka kor, kaba la pyntreikam ha u snem 2023, ka dei kaba nyngkong eh ha ka thain shatei lam mihngi ka ri India. La shna khnang ban pynbiang ia ki jingbam ba la ai jingiarap da kaba suk, kane ka rukom ka ailad ia ki nongioh jingmyntoi ban lum ia ki hok jong ki lyngba ka jingpynshisha biometric, kaba pynthikna ia ka jingshai bad ka jinglong kaba thikna ha ka jingsam.Ka Bambhaniya ka la ïakren bad ki nongïoh jingmyntoi na ka National Food Security Act (NFSA) bad peit bniah ïa ka jingïaid beit ïaid ryntih jong ka jingpynïaid online ba la pynlong da ki nongïoh jingïarap. Katei ka jingthmu, kaba dei ka jingiatreilang hapdeng ka tnat Food Civil Supplies and Consumer Affairs Meghalaya bad ka United Nations World Food Programme (WFP), kala iaroh kum ka jingjop ha ka jingpynbiang bam.Ka Bharat Nirman Rajiv Gandhi Seva Kendra Building, Mawdiangdiang:

Ha Mawdiangdiang ka Bambhaniya kala leit ban jurip ïa ka Bharat Nirman Rajiv Gandhi Seva Kendra (BNRGSK), kaba don ka bynta kaba kongsan ha kaba pynïaid ïa ki prokram pynroi nongkyndong kum ka MGNREGA bad PMAY-G. Ha ka jingleit jngoh jong ka, ka la bishar bniah ïa ka jingpynheh ïa ka jaka, kaba la kiew na ka jingheh kaba nyngkong kaba long 710 phut sha ka 1,474 phut, da ka jingkyrshan jong ka Dorbar Shnong. Ka Myntri Sorkar Pdeng kala ai khublei ia ka jingiatreilang hapdeng ka Sorkar Jylla, ki bor shnong, bad ki nongshong shnong ha kaba pynthikna ba kane ka pdeng kan pynbiang bha ia ki jingdonkam ha ka roi ka par ha ki thain nongkyndong. Ka Mawdiangdiang Anganwadi Centre: Ka Myntri Sorkar Pdeng kala ïakren bad ki nongtrei Anganwadi bad ki khynnah shaphang ka jingroi jingpar jong ki khynnah rit bad ka jingdonkam kaba kongsan jong ka jingbam bad jingkyrshan ia ka jingbha jingmiat jong ki kmie bad ki khynnah. Ka la ïaroh ïa ka jingpyrshang jong ka centre ha kaba ai jingkyrshan ha ka liang ka jingbam bad ki prokram pynroi, kaba pyni ïa ka jingangnud jong ka sorkar ban pynbha ïa ka jingim jong ki khynnah rit ha ki jaka nongkyndong. Ka skim shna iing PMAY: Ka Myntri ka la leit jngoh ia ka shnong Mawkasiang, ha kaba ka la jurip ia ki iing kiba la shna hapoh ka Pradhan Mantri Awas Yojana-Gramin (PMAY-G). Ia kine ki iing kiba la dep pyndep hapoh ka por ba la buh, la shna na ka bynta ki nongioh jingmyntoi kynthup ka kong Deisha Warbah bad Dismolin Warbah.

Ka jingpyntreikam hok ia ka skhim shna iing la pynpaw kum ka sienjam kaba kongsan ban pynbha ia ka jingim jong ki longiing haki thain nongkyndong. Ka ïing ri khunswet jong ki khynnah, Mawdiangdiang: Ka Bambhaniya ka la leit jngoh ruh ïa ka Children’s Home for Boys ba la pynïaid da ka Sorkar ha Mawkasiang, ka jaka ka sumar mynta ïa 31 ngut ki khynnah.  Ki khynnah, kiba la buh lyngba ka Child Welfare Committee, ki wan na ki jaitbynriew bapher bapher, kynthup ïa ki ïing kiba don tang uwei u kmie u kpa, ki jingjia ba shah thombor ha ïing ha sem, bad ka jingbym don ïing don sem. Ka Myntri kala jurip ia ka kamra thiah jong ka iing, ka kamra bam, bad ka kamra rwai, da kaba kyntu ia ka jingdonkam ban leh ia kine ki khynnah da ka jingsngewrit bad jingsumar kum ba ki dei ki jong ki.Village Health Council, Umroh Village: Ka jingleit jngoh jong ka Myntri ka la kynthup ruh ïa ka jingleit jngoh ïa ka shnong Umroh kaba hap hapoh ka Diengapsoh PHC, ha kaba ka la bishar bniah ïa ka jingtreikam jong ka Village Health Committee (VHC).  Ka Bambhaniya ka la iaroh ia ka jingtrei shitom jong ka VHC ha kaba kyntiew ia ki jingshakri ha ka koit ka khiah, kum ka jingai dawai, ka jingpeit bniah ia ka jingpang sniehdoh, bad ka jingai jingmut ia ki jingpang bym lah ban saphriang kum ka jingpang sniehdoh bad ka jingpang shini. Ka la sngewtynnad khamtam eh ïa ka jinglah jong ka shnong ban ai dawai 100% bad ka jingkha khun ha ki jaka sumar ha ka snem mang tyngka ba la dep. Ha ka jingleit jong ka Myntri ka Sorkar Pdeng, ka VHC ka la ïasam ïa ka jingjop jong ki ha kaba pynlong ar tylli ki camp jong ka koit ka khiah, kawei na kine la pynïasoh bad ka jingïakhih TB kaba 100 sngi.

Ka Myntri ka la iaroh ia ka jingiatreilang hapdeng ki bor shnong, ka tnad ka koit ka khiah, bad ki paidbah na ka bynta ban pynbha ia ki jingmih na ka koit ka khiah jong ki paidbah. Hadien ka jingleit jurip, ka Bambhaniya ka la pynpaw ia ka jingsngewkmen ia ka jingiaid shaphrang jong ki skhim Sorkar bapher bapher, khamtam kito kiba pynleit jingmut ha ka roi ka par nongkyndong, ka koit ka khiah, bad ka jingbha jingmiat jong ki khynnah. Ka la pynshlur ïa ki nongshim bynta bad ki bor synshar ha ka thaiñ ban bteng ïa ka jingpyrshang ba radbah jong ki ban pynthikna ba ki jingmyntoi na kine ki prokram kin poi sha uwei pa uwei u nongshong shnong uba dei hok. “Ka jingiatreilang hapdeng ka Sorkar Jylla, ki nongshong shnong, bad ki jingthmu jong ka Ri ki long ki shabi jong ka jingjop jong kine ki prokram. Nga ngeit skhem ba ki kam kiba ngi trei mynta ka sngi kin wanrah ïa ki jingbha kiba neh ha ka jingim jong ki paidbah ka Jylla Meghalaya” la ong ka Myntri ka Sorkar Pdeng. Ka jingleit jurip ka Myntri Sorkar Pdeng ka la pynpaw ia ka jingdonkam jong ki jingpeit bniah ha ki jaka bad ki jingiatreilang ban pynthikna ia ka jingpyntreikam kaba jop ia ki skhim jingiarap, kaba buh ia ka nongrim kaba skhem na ka bynta ki jingpynbha ha ka thain ha ka lawei.