Pynheh ka Assam ia ka surok Langpih-Komphaduli, pan jingshai ka FKJGP na u DC

Hadien ba ka sorkar Assam ka la sdang ban shna pynheh ia ka surok na Komphaduli sha Langpih bad Mawsikar, na ka liang ka Federation of Khasi Jaintia & Garo People (FKJGP) Ri Muliang Circle, ka la leit ban iakynduh bad pan jingshai na ka Deputy Commissioner ka WKH ha kaba iadei bad katei ka kam. U Bah Serbilin Lyngdoh, President ka FKJGP Ri Muliang Circle u la ong ba ka seng ka la leit ban pan jingshai na u DC la na ka liang ki bor sorkar jong ka Meghalaya ki don jingtip ne em halor katei ka kam katkum ba la kdew ha ka Status Quo.

Ka seng ka la pan jingshai ruh ba hato kane ka jingiai wanrah ka Assam ia ki kam pynroi ha ka thain Langpih kan  ktah ne em ia ka mat iapynbeit pud hapdeng ka Meghalaya bad Assam, namar ki don bun tylli ki shnong Khasi bad Garo ki bym kwah ban hap ha Assam hynrei ki don sha shiliang jong kane ka surok bala pyntrei da ka Sorkar Assam. Ki la iathuh ba na ka liang jong DC u la pynsngew ba ka la don ka jingpyntip na ka liang jong ka sorkar Assam halor ka jingpyntrei ia katei ka surok bad ka la don ruh ka jingiakren naduh mynshwa ba ia ki kam pynroi da ka Assam ne Meghalaya ruh yn ym dei ban khang na ka bynta ka jingmyntoi jong ki paidbah kiba im ha ki bynta khappud. U la ong ba ka Meghalaya ruh ka pyntrei ia ki kam pynroi kum ka Skhim sam umbam sha ki shnong ki thaw bad ki iing ki sem bad na ka liang ka sorkar Assam ruh kam shym la pynthut ia kine ki kam pynroi jong ka sorkar Meghalaya.

U Bah Serbilin Lyngdoh u la pynpaw ruh ba lada ka jingwanrah kam pynroi jong ka sorkar Assam kam ktah ia ka mat jingiapynbeit pud, ngin ym tuklar ia kata hynrei lada ka ktah, ngi kren da kaba shai ba ngin ym pdiang dalei lei ruh.