Ai dorkhas ki MLA ha u MR, ban pynpoi lynti rel sha Dhaka lyngba ka Bagmara

Lai ngut ki 3 ngut ki MLA na South Garo Hills hapoh ka jingialam u Myntri ka tnad pule u Rakkam A Sangma hynne ka sngi ki la ai da ka dorkhas ne ka Memorandum sha u Myntri Rangbah ka Jylla u Conrad K Sangma na bynta ban pynpoi lynti rel na Guwahati lyngba Mendipathar sha Baghmara bad ha Dhaka ha  Ri Bangladesh.“Ngi kyntu da ka jingsngewrit bad da ka jingburom iaki ophis jong phi ban sngewbha ban shim ïa kane ka kam bad ka tnat Railways ka Sorkar India na ka bynta ban pynrung ha ka National Railway Development Plan ban pynwandur bad ka jingshna ïa ki jingdonkam ban pynurlong ïa kane ka projek ban pynïasoh daka lynti Rel shaduh Bagmara” ong u Rakkam haka Dorkhas.

U Rakkam u la ong ba kane kan plie lad shisha ïa ka Global Tourism Integration ha kylleng ki Ri kiba don hapoh ka SAARC, BIMSTEC, ASEAN bad ki Ri hapoh ka Indo-Pacific. “Ka lynti ïaid kaba ïadei bha ban pynkiew ym tang ïa ka jingïatreilang ha ka liang ka ioh ka kot hynrei kan ïarap ruh ban tei ïa ka jingïadei kaba khlaiñ ha ka kolshor bad ka pule puthi hapdeng ka India bad ka Bangladesh. Ngi ngeit skhem ba kane ka Railway Link ka lah ban long ka jingkylla ha ka jingialehkai ha kaba kyntiew ia ka roi ka par ha ka thain. Ngi ngeit ba phin pyrkhat bha ïa kane ka jingkyrpad bad shim ïa ki sienjam kiba donkam ban sdang ïa ka jingïakren bad ka tnat Railway ka Sorkar Pdeng na ka bynta ban pyntreikam ha ka por kaba biang ïa kane ka projek kaba kongsan” u la bynrap.

U la ong ba ka jingpyniasoh daka Rel ka lah ban pynshisha iaka jingdon jingem jong ka thaiñ bad kan ai jingmyntoi ym tang ia ka Jylla hynrei ia ka bynta jong ka thain shatei lammihngi bad ka Ri baroh kawei. Ka jingjngai hapdeng ka Baghmara bad ka Mymensing, ka Ri Bangladesh ka don iaka jaka ba hap hapoh ka International Cross-Border kaba pynlong ïa ka jaka kaba jan tam na ka bynta ka jingpynïasoh Rel hapdeng ka Ri India bad ka Ri Bangladesh. Ka lynti Rel ka don ka jinglah kaba khraw ban pynsuk ia ka khaii pateng ha ka pyrthei, ban pynshlur ia ka kam jngohkai pyrthei, bad ban kyntiew ia ka jingiasam jingtip hapdeng ki 2 tylli ki Ri. Shwa ban ioh ia ka jinglaitluid, ka India bad Bangladesh ki iasam ia ka jingiadei kaba khlain bha ha ka khaii pateng, khamtam eh lyngba ki rukom iadie iathied.