Donkam ka jingiatreilang na baroh ar Jylla halor ka jingjaboh ka thain Byrnihat

U Myntri Rangbah ka Jylla Conrad K Sangma hynne ka sngi ula pyntip ha ka iing ba ka Sorkar ka la bthah ia ka tnat Meghalaya State Pollution Control Board (MSPCB) ban leh da kaba tyngeh pyrshah ia ki karkhana ha Jylla kiba pynkhein ain, kaba pynjaboh ia ka lyer bad ki shnong ki thaw. Ïa kane u Conrad ula kren haba haba jubab ia ka Call Attention Motion ba la wanrah da u MLA ka NPP na Jirang constituency u Bah Sosthenes Sohtun halor ka jingkhein sting ka CPCB kaba pyni ia ka jingjaboh ka lyer ha Byrnihat Ri-bhoi District. Haba kren hapoh ka Iingdorbar u Conrad ula ban jur ia ka jingdonkam ia ka Jylla Meghalaya bad ka Assam ban leh eiei noh halor ka jingjaboh ka lyer hapoh ka thaiñ Byrnihat Ri-bhoi district.U Conrad ula pyntip ba ka MSPCB ka la khang tala ia bun tylli ki karkhana hapoh ka Jylla hadien ba lap ba ki pynkhein ia ki kyndon ain.

“Nga phah ia ka khubor ba tyngeh sha baroh ki karkhana ba ka MSPCB ka la pynlong ia ka jing jurip ba khlem pyntip iano iano ruh. Nga la dep ai ka hukum ia ka MSPCB ba kan leit jurip khlem da pyntip iano iano ruh bad ban leh ia kaba donkam” la ong u Conrad.U Conrad ula pyntip ba ki don haduh 7 tylli ki karkhana ba shah khang khyrdep namar ka jingpynkhein ia ki kyndon ain, kaba wanrah ka jingjaboh ia ka mariang bad ki sawdong saw kun.“Namar kata, ki jingjurip ba kynsan kynsan kin nang bteng bad haba ngi shem ia kino kino ki karkhana ba pynkhein ia ki rule, ka Sorkar kan leh da kaba tyngeh pyrshah ia ki” u la ong.Ha kajuh ka por, u Myntri Rangbah u pyntip ba un sa thoh shithi sha u Myntri Rangbah ka Assam Himanta Biswa Sarma halor ka jingdonkam ia ki ar Jylla ba kin leh eiei halor ka jingjaboh ka lyer. “Ki ar Jylla bad ki ar Pollution Control Board ki dei ban iatreilang bad ngi la shim ia ka sienjam ban pynurlong ia kane” ula ong.

“Hynrei, shuwa ba ngin iakren ia ka Sorkar Assam, ngi hap ban leh eiei da kaba tyngeh ia ki karkhana ba don ha Meghalaya kiba pynkhein kyndon ain kumba la pruid dak na bynta ka bha ka miat bad ka imlang sahlang” bynrap u Conrad.Kumjuh ruh, u Myntri Rangbah ula khot ia ki Dorbar Shnong ka thain ba kin iatreilang bad ka Sorkar ban tehlakam ia karkhana ne ki kam ba wanrah ia ka jingjaboh.