Ka long kum ka jaka set mrad Kyntait ki nongdie madan ban kynriah ha Brightwell Bungalow

Ki nongdie madan na thain Laitumkhrah hynne ka sngi ki la pynpaw ka jingbitar ia ka sorkar ba ka jaka ba ka pynkhreh ban pynkynriah ia ki, ka long kum ka jaka set mrad.Ki nongdie madan ha ka thain Laitumkhrah ki don kumba 100 tam eiei, ki la kyntait ban kynriah na Laitumkhrah bad kim pdiang ia ka jaka kaba ka sorkar ka ai ha Brightwell Bungalow, Barik.“ Ngim pdiang ia kane ka jaka bad ngim kynriah katba ka sorkar kam pat lah ban ai jaka ia ki kaba biang bad kaba dei ban don ha ka thain Laitumkhrah hi,” ong ki nongdie madan.Katkum ka jingiathuh ki nongdie madan, ka sorkar ka la pynbor ia ki ban shim ia ka Certificate of Vending (COV) hynrei kim shym la poi pyrkhat ba kan ai jaka ia ki ha Dhanketi kaba long ka jaka khlaw.“Iangi kiba die jingdie ha Laitumkhrah, ka sorkar ka la bthah ba ngin leit shim ia ka COV bad ngi la leit shim bad ngi la pyrkhat ba ka ai ka jaka kaba biang hynrei ka jaka ba ai ka long kum ka jaka ba set ia ki mrad. Ym ithuh kano ka khmat kano ka dien hynrei ka la long kum ka sem sniang ban ai jingbam ia ki sniang,” la ong ki nongdie madan.

Ki la ong ba kim mon ia ka jaka ba la pynkhreh da ka sorkar bad da lei lei kin ym pdiang. Ki la kyntu ia ka sorkar ba kadei ban peit biang sa shisien ka jaka, kumba ka leh ia ki nongdie madan ha Khyndailad ka ai jaka ha katei ka thain hi bad ia kiba shong ha Civil ka ai hajan Civil hi.  “Ka sorkar kadei ban wad ka jaka ia ngi ha ka thain Laitumkhrah. Ngi shim ia ka COV da ka jingpynborKi la kyntu ia ka sorkar ba kam dei ban pyllut phut kai ka pisa bad kadei ban wad da ka jaka ba biang. Kum ban shu kdew ba dang shen ka ophis jong ka Shillong Municipal Board (SMB) ka la pynmih ia ka jingpynbna ba ym shah shuh ban shong die madan ha shi lynter ka surok ka thain Laitumkharh, Dhankheti, Malki Point, Barik, Phannonglait Park, Redcross, Laban, Lumshatsngi.

Ha ka jingpynbna ba la pynmih da Chairperson ka Town Vending Committee & Chief Executive Officer, Shillong Municipal Board, la ong ba kitei ki jaka la pynbna kum na “No Vending Zone” mardor, khnang ba ka iaid ka ieng ki kali kan iaid beit bad na bynta ka bit ka biang ki paidbah bad la bthah ba baroh ki nongdie madan kiba don ia ka Certificate of Vending (COV), kidei ban kynriah noh sha ka jaka ba la pynkhreh ha shwa ka 17 tarik Nailar 2026. Kino kino ki bym bud ia ka hukum yn shah dain kuna bad pynshitom katkum ka Meghalaya Street Vendors (Protection of Livelihood and Regulation of Street Vending) Scheme, 2023.