T.175.45 klur ka tnad DoNER ban kyntiew kam rep shynrai Lakadong

U Myntri ka Sorkar Pdeng uba khmih ia ka DoNER u Jyotiraditya M Scindia ryngkat bad u Myntri Rangbah ka Meghalaya u Conrad K Sangma, ki la pyllait paitbah ia ka Meghalaya Lakadong Turmeric Integrated Development Mission ha ka jingialang ha Sanchar Bhavan, New Delhi.

Ha kane ka jingialang hynne ka sngi Baar, la iadonlang u Myntri ka Sorkar Jylla uba khmih ia ka rep ka riang u Timothy D Shira, ka Sukanta, Majumdar ka Myntri Khynnah ka DoNER, Secretary ka DoNER Nivedita Shukla, Commissioner & Secretary ka Meghalaya u Dr Vijay Kumar D bad ki nongmihkhmat na ki kompani Dr Hemanth Kumar Manikyam, Ziran India bad kiwei kiwei bad ki nongiashimbynta na ka nongbah Shillong kila iashimbynta ia kane ka jingialang da kaba leh ia ka Video Conferencing.

Kane ka projek ba T.175.45 klur la bei da ka Ministry DoNER/NEC, Ministry Agriculture & Farmers’ Welfare lem bad ka Sorkar Meghalaya.

U Jyotiraditya M Scindia ula ong, ba ka jingialang ka dei ka dak jong ka jingpynlait ia ka Mission Golden Spice kaba pyni ia ka thong u Myntri Rangbah duh ka ri u Narendra Modi na ka bynta ka roi ka par jong ki Jylla ka thain Shatei Lam Mihngi, kaba kynthup ruh ia ki jingtei ba kynsai ka Jylla bad ka roi ka par ha ka imlang sahlang.

“Ki Jylla ka thain Shatei Lam Mihngi kim dei shuh tang u pud ka jingpynroi hynrei kila kylla long ki jaka pdeng jong ka roi ka par ka ri India” bad ka bynrap ba ka thong ka phaikhmat eh halor ka jingpynroi ia ki jingtei bad ki jingpynbiang ha ka imlang sahlang kum ki iingsah, ka koit ka khiah bad ka pule puthi bad ka kynthup ruh ia ka jingpynroi ia ki jinglah ba kyrpang jong kawei pa kawei ka Jylla haba ianujor ha ka thain, ka ri bad ka pyrthei.

Ula ban jur halor ka jingkongsan jong ka Unique Selleng Proposition (USP) ki Jylla bad ka bynta jong ki Kynthei ha ka imlang sahlang ki nongrep.

U Myntri ula ong, ba ka jingsdang jong ka Mission Golden Spice kadei ka prokram ban wanrah jingkylla da ka jingdon ka lad ban pyniaid iew ha kylleng ki ri ka pyrthei bad bynrap ba kane ka prokram kan pynkupbor ia ki nongrep kynthei, haba banjur ia ka jingpynkynriah ia ka roi ka par na ka bynta ki kynthei sha ka roi ka par ba ialam da ki kynthei ha India.

Haba ai khublei ia ki nongrep kynthei namar ka jingtrei shitom bad synniang sha ka jingkyntiew ia ka bor jong ka India ha ka rynsan ka pyrthei, ula pyntip ba ka jingkren u Myntri Rangbah duh ka ri shaphang u shynrai Lakadong ka Meghalaya hapoh ka G7 Summit ka dei ka jingjop kaba khraw. Ula ban jur ia ka jingdonkam ban ia pyrshang lang da baroh ban pynthikna ia ka jingioh jingithuh da ka pyrthei ia u shynrai Lakadong kaba la pynshong nongrim ha ka jingbha, ba dei hok, ba khlem khleh dawai bad ba iai neh.

Katba u Conrad K Sangma ula ong, ba ki Jylla ka thain Shatei Lam Mihngi kila iohi ia ki jingkylla hapoh ka Ministry of DoNER hapoh ka jingpyniaid u Myntri, Jyotiraditya Scindia da kaba phaikhmat sha ki bynta kum ka rep ka riang bad ki kam jngohkai.

Ula bynrap ba u shynrai Lakadong u dei uba pher bha na ka bynta ka ri-lum Jaintia bad ula pyni ia ka jingdon ia ka ‘Curcumin’ ba kyrpang ka bym lah ban don ha kiwei pat ki thain wat hapoh Meghalaya.

“Ka rukom long ka khyndew bad ka sawdong sawkun ha West Jaintia Hills bad East Jaintia Hills ka pynthikna ia ka jingbha u shynrai Lakadong, kaba pynlong ia u kum u mar ba dei eh na ka bynta ka mission” ula ong.

Ula kren ruh halor ki jingai jingmyntoi jong kane ka prokram ia ki nongseng kam kynthei bad nongrep da ka jingkylla ka jingim ki hajar ngut namar u shynrai Lakadong bad bynrap ba ka mission ka wan ha ka por kaba dei eh naba yn iarap shikatdei eh na ka bynta ka jingkiew bad ka roi ka par ha kane ka kam.