Ai nam u Kitkupar Nongsiej ïa ki takma ba khur na WCOPA ia ka India

Hapdeng ka jinglynga bad pisa mynsiem ba ki paidbah ba ap khmih lynti, la u Kitkupar Nongsiej uba mihkhmat ïa ka ri India sha ka 28th World Championships Performing Arts ba la long ha America un ïoh rah ne em ïa ka nam lahduh hadien ba ula shah jied sha ka top 5 napdeng ki 60 tylli ki ri ka pyrthei ba ïashim bynta ha ka WCOPA.

Hynrei ka khubor ka la mih na America ba ïa ka nam lahduh ne Grand Champion Vocalist of the World la ïoh rah da ka ‘thei nongrwai na philippines bad u Kitkupar Nongsiej ula ïoh ïa ka top 5 medal da kaba khur 3 tylli ki takma ksiar, 2 tylli ki takma rnong bad ka First Place Award Scholarship ba la ai kyrpang ïa kiba tbit.

Wat la u Kitkupar Nongsiej um shym la ïoh ïa ka nam Grand Champion Vocalist of the World, hynrei haba ai jingkren ha America ula ai nam ïa ki 5 tylli ki takma ba la khur na ka WCOPA sha ka ri India, ka jylla Meghalaya bad sha ka shnong Kynshi Pyllun.
Kum ban shu pynkynmaw ki ri ba la ïoh ban rung sha ka ka top 5 ban ïakhun ha ka Grand Finale ha ka lympung ïakob ba heh ka pyrthei ne International Theatre ha Neveda, Las Vegas, ki long ka USA, India, Norway, Philippines bad UAE bad na ki Top 5 la jied tang iwei i nongjop ban rah ïa ka Grand Champion Vocalist of the World.

Ka President jong Worldstars USA, ka Danielle Jenco, ba dei ka Event Producer bad Finale Show Director jong ka World Championships Performing Arts, ka la pynpaw ïa ka jingsarong ban ïohi ïa ka sap rwai u samla kitkupar Nongsiej.