Shen yn khot jingialang ka sorkar ia ki sengsain hima, sengbhalang halor ka lynti rel

U Myntri Rangbah ka Jylla Conrad K Sangma hynne ka sng ula pyntip hapoh ka Iing dorbar thawaiñ ba ka Sorkar Jylla kan sa khot jingialang ia baroh ki seng sain pyrthei bad ki kynhun bapher bapher ban iakren halor ka jingpyntrei ia ka lynti rel. Ïa kane u Conrad ula pyntip haba jubab ia ka Short Duration Discussion ba la wanrah da u MLA ka VPP na Mawlai u Bah Brightstarwell Marbaniang halor ka jingkren u Myntri Sorkar na Jaintia Hills haba ia dei bad ka lynti Rel. Haba kren hapoh ka Iing dorbar u Conrad ula ong, ba ka mat ba hakhmat jong ka Sorkar ka dei ban iada ia ka Jylla na ka jingwan rung kyrthep ki bar jylla sha Meghalaya. “Ngin sa khot ia katto katne ki jingialang bad ki seng sain pyrthei lem bad ki kynhun bapher bapher ban iakren ia kane ka kam. Ai ba ngin buh ia kiei kiei baroh halor ka miej, iathir iatar ia kane ka kam bad ngin ia peit la ka don ne em ka lynti ban jam shakhmat haba ia dei bad ka jingpyniasoh lynti rel” la ong u Conrad.U Conrad ula ong, ka Sorkar ka buh ha khmat ia ka sur ki paidbah haba ia dei bad ka rai ban pyniar ka lynti Rel ha Meghalaya.

Ula ong ba ka Sorkar kan pyniaid shakhmat ia kine ki project tad hadien ka jingiasyllok bad ki kynhun bapher bapher ban ioh ia ka jingmynjur lang. U Myntri Rangbah ula pyntip ka Sorkar India ka la tyrwa ban pyniasoh lynti rel sha man ki kyndong kynshrot bad jan baroh ki Nongbah ki Jylla bad bynrap “Ngi lah ban long tang ma ngi kaba la shah ieh khlem ka jingpyniasoh lynti rel bad lehse lada ngi duh ha kane ka kynti, ngam tip shuh lano kane ka kabu kan wan biang”. “Kumta ka long kaba kongsan ba ngin sngewthuh ia ka jingkhia ka kam. Lada ngi khmih ia ki jing sngewkhia ba dei hok halor ka jingrng ki mynder, ngi lah ban wad ia ka lynti shakhmat ban leh eiei ia baroh ki jingdonkam bad ban nym duh ia kane ka projek ban wanrah jingkylla ia ki briew jong ngi khamtam ki nongrep bad ki nongsengkam” u la ong.

Ula pyntip ha ka jingiakynduh jong u ia u Myntri ka Sorkar Pdeng ban iakren halor ka jingbym lah ka Sorkar ban pyniaid shakhmat ia ka Byrnihat railway project, ula pynpaw ba u lah ban wad ia ki lad ki lynti bad ban lap da kaba iakren ia ki nongshong shnong.