klur thied synsar ka sorkar na ki nongrep ha ka jylla

Ka Myntri ka tnad ka rep ka riang ka jylla ka kong Ampareen Lyngdoh ka la iathuh ba ka sorkar jylla lyngba ka skhim Procurement and Aggregation Scheme ka la pyllut T.4.76 klur na bynta ban thied 500 metric ton u synsar na ki nongrep ha ka jylla. Ka Myntri haba jubab ia ka jingkylli ba la wanrah da u MLA ka UDP na Amlarem u bah Lahkmen Rymbui hynne ka sngi ha Iing Dorbar, ka la ong ba namar ka jinghiar dor jong u synsar, ka sorkar ha u snem 2024-25 ka la iarap ban thied ia u synsar na ki nongrep haduh 500 metric ton, katba mynta u snem ha ka 10 tarik Kyllalyngkot, 2025 ka la wanrah sa ka skhim CM ASSURE ban iarap thied ia ki synsar na ki nongrep haba hiar dor ka iew.  “Kane ka skhim Procurement and Aggregation Scheme kaba pyntreikam da ka Meghalaya State Agricultural Marketing Board ka long na bynta iarap ia ki nongrep tang ha ka por ba tad dor palat u synsar khnang ba ki nongrep kin ym kynduh jingeh,” ong ka kong Ampareen. Ka Myntri ka la iathuh ba ka jylla ha u snem 2022-23 ka la pynmih 66,831 metric ton u synsar, ha u snem 2023-24 ka pynmih 75,680 metric ton bad ha u snem 2024-25 ka sorkar ka dang lum jingkhein.

Ka la iathuh ruh ba ka iew synsar ka hiar ka kiew ha kine ki snem namar ba kiwei ki jylla ruh ki la sdang ban ia rep ia une u marrep synsar kum sha Assam bad kiwei de ki jylla.Ka la ong ba ha u 2022-23 ka dor jong u synsar shi quintal ka long T.12,188, ha u snem 2023-24 ka hiar sha ka T.8,400 shi quintal katba mynta u snem 2024-25 ka la poi sha ka T.4,685 shi quintal. Haba bynrap halor kane, u Myntri rangbah u Conrad K Sangma ula pyntip ruh ba ki don ki jaka thain synsar ha ka jylla ban iarap ia ki nongrep synshar.  U la iathuh ba ki don ki kynhun kiba seng ia ki karkhana thain synsar ha kane ka jylla kynthup kawei ha Wahiajer bad kawei ha thain Mawkynrew.

“ Ka sorkar kan sa nang buh shuh shuh ki kharkhana  thain synsar khnang ban iarap ia ki nongrep,”ula ong. Ha kajuh ka por, u bah Renikton Tongkhar u la kyntu ia ka sorkar ba kan buh ia kawei ka karkhana thain synsar ha Mawkyrwat khnang ban iarap ia ki paidbah nongrep ka thain ha South West Khasi Hills.