Ka jaka 137 akar ban pynkylla ‘Industrial Estate’ ha Byrnihat kam dei ka khlaw: Conrad

U Myntri Rangbah ka Jylla Conrad K Sangma hynne ka sngi ula pyntip ba ka jaka ba 137 akar ba la tyrwa pynkylla Industrial Estate ha Byrnihat Ri-bhoi district kam dei satia ka jaka khlaw  (Forest Area), kumba la kynnoh da kiba bun balang. Ïa kane u Conrad ula pyntip haba jubab ia ka Short Duration ba la wanrah da u MLA ka VPP na Mawryngkneng constituency u Bah Heaving Stone Kharpran halor ka jingthmu pynkylla ia ka jaka khlaw  (Forest Area) sha ka Industrial Estate. Haba kren hapoh ka Iing dorbar u Conrad ula ong, ka sorkar kan ym iaid shakhmat ia ka kam katba kam pat ioh ka jingmynjur na ki padbah. “Ai ba ngan pynshai ia ka jingsngewthuh bakla ba kane ka jaka kam dei ka jaka bala ithuh kum ka khlaw haduh mynta. Kam dei satia kaba ngi shu shim ia kane ka jaka bad lashai lashai hi kin mih ki karkhana. Ka kam kaba ngi sdang ia mynta ka long ban aiti ia ka jaka na ka Tnad Soil & Conservation bad tnad Horticulture sha ka Sorkar. Tang kane hi. Kam pat don eiei ia mynta” la ong u Conrad.

U Conrad u la iathuh ruh ba iaki 2 tylli ki tnat, ka Sorkar kan sa ai bujli ia ka jaka sha kiwei ki jaka naka bynta ban ioh pyndonkam ban ai jingmyntoi iaki paidbah. U la ïathuh ba ka jingheh jong ka jaka kam dei da ki hajar acre, ka dei 137 acre ha kaba 127 acre ka dei jong ka Tnad Soil bad 10 acre ka dei jong ka Tnad Horticulture bad kumba 55.9% na kane ka jaka ka dei ka madan khah. Ha kajuh ka por, u Myntri Rangbah ula iai ban ba ka jingkylli kam mih satia ba kan don ka jingiaid lait ia ka Land Transfer Act haba pyntreikam ia ka Meghalaya Investment Promotion Agency (MIPA).

“Ka don ka jingsngewkhia ba ngin sa ai jaka sha ki kompani shimet bad iaid lait ia ka Land Transfer Act. Ka jingkylli kam mih satia ban iaid lait ia ka LT Act. Ka dei ka ain ba kongsan bha kaba ngi don bad kaba la iada ia ki paidbah jong ngi da ki snem bad ym don satia kino kino ki agency kiba lah ban iaid palat ia kane ka ain bala mynjur da kane ka Iingdorbar” ula ong.“Kumta ai ba kan shai ba kam nym don satia ka jingaiti ia ka hok longtrai ia ki jaka da ka MIPA. Ki sienjam bala pyntreikam ha ki por bala leit noh lyngba ka MIDC, MeEC bad kiwei kiwei ki long kumjuh hi. Ka jingkylli ba ka MIPA ka ioh bor kyrpang ruh kam mih satia…Ia ka MIPA la wanrah ban pynsuk ia ka jingwan kynshew kam bad kan bud ia ujuh u shabuk, kijuh ki rule bala bud da kiwei ki Agency jong ka Sorkar. Ka jingkylli ba ngin iaid lait ia ki paidbah, nongialam shnong, ki ain kin ym mih satia” u la bynrap.