Rakhe ka RBSK ka jingdap 10 snem ka jingshakri ia ka koit ka khiah ki khynnah ba hapoh 18 snem

Ka Rashtriya Bal Swasthya Karyakram, Meghalaya hynnin ka sngi ka la rakhe ia ka jingdap 10 snem ka jingjop jong ka jingiaid lynti na ka bynta ban shakri ia ka koit ka khiah ki khynnah ba hapoh 18 snem ka rta ha ka jingialang ha GHM Guest House Jowai. La donlang ha kane ka jingialang u F Passah, Assistant Commissioner, Jowai  kum u kongsan, nangta ka Dr. P. Shylla, District Medical & Health Officer, Jowai, ka Dr. Helen Uriah, DMCHO, Dr. A E Pastwet, Pediatrician, Dr. J. Lakiang, MO DEIC, Doctors bad ki dkhot ka kynhun Mobile Health Team (MHT) kumjuh ka kynhun District Early Intervention Centre (DEIC) jong lai tylli ki District ka Jylla ba kynthup ka West Jaintia Hills, East Jaintia Hills bad Ri Bhoi District. Ha kum kane ka sngi la ithuh bad burom ruh  iaki briew jong ka tnat ka koit ka khiah kiba la noh synniang  naduh ki kynhun mobile health team bad kiwei pat ki kynhun na Rilum Jaintia Hills bad Ri Bhoi District ba kila shimkhia ban pynioh ki lad jingsumar haka por ba biang iaki khynnah ba hapoh 18 years ka rta.

U F. Passah, Assistant Commissioner haba kren kum u kongsan u ai jingiaroh ia kane ka kynhun halor ki kam ba kala leh, bad wat hapdeng bun ki jingeh naka por shaka por ki iai ialeh shitom ban lap iaki jingpang jingshitom ki khynnah bad ruh ban pynbiang iaki jingdonkam jong ki naka bynta ka bha ka miat jong ki. Ka Dr. I Gatphoh, State Nodal Officer, RBSK  ka pynpaw ka jingsngew sarong  iaka lynti iaid ba 10 years kane ka RBSK kaba la sdang naduh u snem 2013 daka jingiohi jngai ka sorkar kmie. Ka pynpaw ruh ka jingsngew hun halor ka jingjop kane ka prokram naka bynta ban pynioh ki lad jingsumar haki khynnah. Ka ai jingiaroh ruh naduh ki Mobile Health teams jong ki doctors, ki nurses, ki pharmacists kumjuh ki ASHA, ka khmih lynti ruh ba lyngba ka jingshimkhia ka RBSK yn lah ban pyntikna ruh iaka koit ka khiah naka bynta ka lawei jong ki khynnah ha kylleng sawdong ka Meghalaya.

Ka Dr. Gatphoh ka iathuh ruh ba kane ka prokram ka pynkhlaiñ shuh shuh iaki lad ai jingsumar da kaba leit wad bniah iaka koit ka khiah ki khynnah haki skul, haki Anganwadi Centres bad ruh haki jaka ai jingsumar bapher bapher. Na ka liang ka Dr. H.L Suting, DEIC Manager, Jowai kaba pyniaid iaka jingialang kala pynsngew ruh halor ka jingdonkam ban pynkhlaiñ shuh shuh ki lad ai jingiarap naka bynta ki khynnah ba shah ktah naduh ka por ba kha,  bad bym lah ban heh ban san haka bor met, bor pyrkhat kumba long lem kiwei ki para khynnah.La pynkut iaka jingialang daki kyntien ai khublei na u Johnson J Nongbet, Consultant RBSK-NHM.g