Shah thang jingkieng ha thain Ranikor, thwet ki pulit ia ki runar

Hadien katto katne sngi ba kawei pat ka jingkieng dieng kaba don ha shilynter ka surok Maheskola-Sohhylleng hapoh Ranikor Civil Sub-Division, South West Khasi Hills district ka la shah thang ha ki runar ki bym lah ban tip, ki pulit ki la sdang ia ka jingtohkit bad pynlong ruh ia ka jingthwet kaba jur ban lap ia ki runar kiba donkti ban pynjot ia katei ka jingkieng. Ka jingjia kaba khatduh eh jong ka jingshah thang ki jingktieng ha ka thain Ranikor ka la jia ha ka 15 tarik u Lber, 2025 ha kaba kawei ka jingkieng dieng kaba don ha ka surok Maheshkola-Sohhylleng ka la shah thang ha ki riew bymman bym lah ban tip ha kaba mynta ki la hap ban khang noh shipor.

U Executive Engineer ka PWD Roads, Ranikor Division, u Bah D. Kyndiah hynnin ka sngi u la pynmih ia ka jingpynbna paidbah kum ka jingmaham kaba tyngeh ïa baroh ki briew kiba donkti ne pyrkhat ban leh ïa ki kam pynjulor bad thang ïa ki jingtei hapoh ka Division, da kaba pynpaw ba ki bor synshar kin ym iehnoh da lei-lei tad haduh ban da ioh kem bad pynshitom ia kum kine ki runar da kaba pynngat ha ki kyndon aiñ kiba eh. Haba ïakren bad u nongaikhubor, u Bah Kyndiah u la pyntip ba naduh u snem 2013 ki la don saw tylli ki jingjia jong ka jingshah thang ki jingkieng ha la kijong kijong ki jaka ha ka thaiñ Ranikor kaba la wanrah ïa ka jingthut kaba khraw bad buh jingma haduh katta katta ïa ki paidbah.

U la ïathuh ruh ba katei ka jingkieng dieng kaba la shah thang dang shen ha shilynter ka surok Maheskola-Sohhylleng ka la pynïasoh ïa ki lai tylli ki shnong, kata ka shnong Sohhylleng, Amarsang bad ka shnong Umtongkut bad mynta ki paidbah jong kitei ki shnong ki ïakynduh shibun ki jingeh ha ka leit ka wan bad kumjuh ruh ha ka kit ka bah ïa ki mar ki mata.  Ha kawei pat ka liang, hadien ba la ioh ia ka FIR, ki pulit ki la sdang mardor ia ka jingtohkit halor kane ka kam ban ioh kem ia ki runar kiba donkti ha kane ka kam dusmon. Ki tyllong khubor ki la pyntip ba haduh mynta kim pat lah ban ithuh iano iano, hynrei ki dang peit na baroh ki liang ban sngewthuh ia ki daw kiba don sha lyndet jong katei ka jingjia bad ki pynpaw ruh ia ka jingkyrmen ba ha kine ki khyndiat sngi ban wan kin sa lah ban lap ia ki nongleh kam sniew bad ban pynshitom ia ki katkum ka ain.