Hiar jurip ka MSPCB ia ki karkhana ha Byrnihat ba pynmih tdem jaboh

Ki bor ka Meghalaya State Pollution Control Board (MSPCB), mynta ka 20 tarik Lber ki la sdang ia ka jingjurip ia ki karkhana bapher bapher kiba don ha ka thaiñ Byrnihat ban khmih bniah ia ki rukom pynmih ia ki tdem jaboh, ha kaba ki ophisar lem bad ki riew shemphang na kane ka tnad kin jurip ia baroh ki karkhana kiba don ha kane ka thaiñ kumba 7 sngi eiei shwa ban aiti ia ka kaiphod sha ka sorkar jylla. Lah ban kdew, ba ki bor MSPCB ki la sdang ia ka jingleit jurip ban jurip ia ka rukom pynmih tdem ki karkhana ha ka thaiñ Byrnihat, Ri Bhoi District hadien ka jingpynmih ia ka hukum lyngba u Commissioner Secretary ka sorkar jylla kaba la pynmih ha ka 18 tarik Lber 2025 ban jurip bad khmih ia ka jingtreikam jong ki karkhana bad ruh ban aiti ia ki kaiphod sha ka sorkar jylla.

Ha kane ka jingsdang jong ka tnad MSPCB ban jurip ia ki karkhana la ia donlang da ki bor ka task force, ki riew shemphang, ki Environment Engineer, ba la lamkhmat da u DR. G.H Chyrmang MFS Member Secretary, Bah S. Swer, Scientists lem bad ki Environmental Engineer ba kynthup ia u Bah S. Syiem, u Bah YF Laloo bad u Bah M. Tiewsoh, ha kane ka kynhun ka la jurip shwa ia ki 8 tylli ki karkhana kiba pynmih bha ia ka tdem jaboh. Haba kren bad ki Nongthoh Khubor hadien ba la pyndep ia ki jingjurip, u Dr. GH Chyrmang, u la iathuh ka tnad MSPCB haba bud thik ia ka jingbthah ka sorkar jylla ka la sdang ban hiar jurip ia ki karkhana ban khmieh ia ki rukom treikam ka jong ki haba pynmih ruh ka ki tdem jakhlia, ula bynrap da kaba ong ba watla ki dang sdang ban jurip biang ia ka rukom treikam jong ki karkhana kaban neh mynta kumba 7 sngi bad yn sa aiti pat ia ka kaiphod sha ka sorkar.

 U la iathuh ruh, ba ha kane ka jingjurip kitei ki karkhana la lap ba ki pyndonkam ia ki kor ban tehlakam ia ka jingpynmih ia ka tdem jaboh lyngba ki ki Pollution Control Device (PCD), hynrei la antad ba kine ki karkhana ki pyndonkam ia kine ki tiar tang da don kano kano ka jingwan jurip jong ki bor sorkar ne na ka tnad Pollution Control Board tangban iada na ka jinglutksan ka bai pyndonkam ia ka bording ilektrik bad kiwei kiwei ki jinglut tangban iohnong ki trai jong kine ki karkhana. U Dr. Chyrmang u la iathuh ruh ha kaba ia dei bad ka jingioh nam ba nyngkong ka Byrnihat ban pynmih tdem jaboh tam ha ka pyrthei, kam dei tang na ki karkhana kiba don hapoh u pud u sam ka jylla hynrei ki dei ruh na ki karkhana kiba don marsyndah bad ka Assam ha kaba ki bor ba dei peit bniah ka jylla Assam ruh ki la sdang ban shimkhia ban wad bniah ia ki rukom treikam bad jingpynmih tdem jaboh da ki karkhana kiba don ha ka liang jong Assam. Na kiba bun ki liang, ki la pynpaw pat ba ka jinglah ban khmieh bniah kaba tikna ban tehlakam ia ka jingjakhlia ha ka lyer lyngba ki karkhana ne kiwei kiwei kaba kongsan eh ka long ka jingdonkam ban don noh da ka ophis kaba pura jong ka Meghalaya State Pollution Control Board kaba pura ha ka thaiñ Byrnihat.