Ioh khusnam ka Mawrah Multipurpose Reservoir Project na ka sorkar India

Ka Mawrah Multipurpose Reservoir Project ba la tei da ka sorkar jylla ryngkat ka jingiatreilang bad ka Dorbar Shnong Mawrah, East Khasi Hills District lyngba ka jingkyrshan jong ka Tnad Soil & Water Conservation ka la ioh ia ka khusnam ha ka 4th Water Sustainability Award (National Award) 2024-25 kaba la long ha Jacranda Hall, India Habitat Centre, New Delhi.

Ia kane ka jingai khusnam la pynlong da ka The Energy and Resources Institute (TERI) ryngkat bad ka United Nations Development Programme (UNDP), ka Ministry Jal Shakti (MoJS), ka Department Water Resources ha ka kyrdan “Excellence in Participatory Water Management for Enhancing Water Management through Community Participation”.

Kane ka dei ka sien ba nyngkong ba ka sienjam kaba la shim da ka Tnad Soil & Water Conservation kan ioh pdiang ia ka khusnam ha kaba ia dei bad ka jingpyntreikam ia ka projek da kaba iatreilang bad ka shnong ka thaw bad kane ka khusnam ka dei ka jingai jingithuh ia ka jingtrei ba khlem shongthait jong ka sorkar ban pyntreikam ia ka sienjam ba ia dei bad ka jingkylla ka suin bneng lyngba ka jingiatreilang bad ki shnong ki thaw.

Ka jingai ia ka khusnam Water Sustainability Awards ka dei da ka jingthmu ban pynshlur ban pynurlong ia ka Sustainable Development Goal 6 (SDG -6) halor ka um, da ka lynti ban pynduna ia ka jingpyndonkam palat pud ia ka um da baroh kiba donbyntalang. Kawei na ki mat ban ioh pdiang ia ka khusnam kadei ka jingtreikam bad ka jingdon jingmut jong ka projek (climate resilient water resources management), ka jinglong kyrpang ia ka sienjam kaba la shim.

Ka kynhun ki nongbishar ka kynthup ia ki riewstad na ka UNDP, MoJS, Niti Ayog, TERI bad kane ka kynhun ki nongbishar kala pynpaw “Ka projek ka Mawrah kadei ka sienjam kaba pynthikna ia ka jingatreilang hapdeng ka sorkar bad ka shnong ka thaw, ha kaban ialeh ban pynneh pynsah ia ka um, kaba iarap ha kaban kyntiew ia ka jingim jong ki paidbah ha ka shnong bad ka jingkongsan kane ka projek ka iaid ryngkat lang bad ka jingseisoh jong ka SDG Goal 6”.

Ha kaba iadei bad ka jingkylla ka suinbneng, ka sorkar Meghalaya da kaba iatrei ryngkat bad ka Asian Development Bank kala tyrwa ban pyntreikam 100 % ia ka Climate Financing Climate-Adaptative Community-based Water Harvesting Project ban pynthikna ba kan don ka jingiashimbynta jong ka imlang sahlang. Kane ka projek kaba kot 62.5 million USD [US$50.00 million (ADB) & US$12.50 million jong ka sorkar jylla kan kynthup ia ka jingshna ia ki 532 tylli ki jingtei jongka Climate Resilient Water Harvesting, ki kam kiba iadei bad ka Command & Catchment Area, ki prokram kiban kyntiew ia ka jingim ki briew, ban pynkhlain ia ki jaka pule, ki prokram ai jinghikai, ka jingpyndonkam ia ki kor ki bor teknoloji ha kylleng ki bynta jong ka jylla.

Shuh shuh ka Sorkar Meghalaya kala dep iasoi ha u Nohprah 2024, ban shim ia ka ram bad la sdang pyntreikam ia ki projek ha kylleng ki district ban pynkhlain ban iakhun pyrshah ia ki jingeh kiba mih na ka jingkylla ka mariang. Ha kaba yn thaw ia ki jaka pynlang um ha ka jaka kaba 415 Hektar bad ka jingpynlang um kaba kot 12 million cubic meter, lyngba ka jingiatreilang bad ki shnong ki thaw.