Yn thaw ‘Task Force’ ka sorkar na bynta ki nongri syiar

U Myntri ka tnad Animal Husbandry & Veterinary u Bah AL Hek ula pyntip ka Sorkar Jylla kan sa thaw ia ka Task Force ban peit halor ki nongri syiar ha jylla. U Bah AL Hek ula pyntip ia kane ha ka jingialang bad ka kynhun ki Meghalaya Poultry Farmers and Welfare Association (MPFWA) kaba la long hynne ka sngi. Haba iakren bad ki nongthoh khubor, u Bah Hek ula ong ba ka sorkar kan sa thaw ia ka Task Force kaban khmih ia ki mat kiba mad jingeh da ki nongri syiar bad kumta kino kino ki jingeh kaba ki nongri syiar ki mad, kidei ban ai jingtip ha ka Task Force. Nalor kane u Bah Hek ula iathuh ruh b aula pyntip ia ka kynhun jongka MPFWA ba kam don kano kano ka jingpang ‘Bird Flu’ bad katei kaba ki kren, kadei kaba kila kdew ia kaei kaba la jia ha u snem 2019-2020 ha Haryana bad kam dei satia kaba la jia mynta.

“Lada kadei kaba la jia dang shen, ngin ioh ia ki jingtip kum ka sorkar bad ka tnad kan ym sngap jar, ngin shimkhia mardor ia katei ka jingpang, kaba jia shabar jong ka jylla Meghalaya,” la ong u Bah Hek. U Nongialam ka MPFWA u Bah William Diengdoh ula ong, ba ka seng kala pynpaw ia ka jingsngewkhia ia ka jingpynrung ia ki syiar kiba nabar ka jylla khamtam eh na ki jaka kiba la pynbna ba ki syiar kidei kiba la ioh ia ka jingpang (bird flu). Ula ong, ba kala don kawei ka kali kaba la lap ba kila wanrah ia ki syiar na ka jylla Haryana, Punjab, kaba dei ka jylla kaba la dep ban pynbna bad ia kitei ki syiar la lap noh mardor bad ym shim la shah ia ki ban pynrung shapoh ka jylla. “Da kaba shim ia katei, ngi nga la wan sha ka sorkar jylla ban dawa ba ia mynta shipor ban khang noh shwa shipor ne Temporary Ban ne kino kino ki kyndon, hynrei ngi sngewthuh ba kane kan ym lah ban treikam bad ka sorkar kala rai ban thaw ia ka Task Force ban khmih ia ki jingeh bad ban pynthikna ban jurip bniah katkum ki SOP kaban long katkum ka National Action Plan, ia kaba la dep ban phah da ka Sorkar Pdeng” la ong u Bah William bad ka bynrap “Kala don lypa ka SOP bad ngi khmih lynti ba kin pyniaid noh shakhmat ban pyntreikam ia katei ka SOP.

Shisien ba la pyntreikam ia katei ka SOP, kumta ki briew kiba wanrah ia ki syiar nabar ka jylla kin ioh ban bud ryntih lane kin ioh ban bud ruh ia ka Motors Vehicle Act katkum ka Prevention of Cruelty to Animals bad katkum ka Transportation of Livestock Rules bad lada la pyntreikam ia kine kiei kiei baroh, ngi kyrmen skhem ngin lah ban tehlakam”. Ula pynpaw ia ka jingsngewkmen ia kaei kaba mih na ka jingialang hynrei ki kwah pat ban ioh ba dei ban pyni noh da ki kam bad ka sorkar kan sa thaw ia ka Task Force ha kaba yn kynup lang ia ki dkhot ka seng kum ki dkhot jongka Task Force khnang ba kin lah ban pynsngew ia ki jingduna ne jingdkoh kiban mih ha ki sngi kiban wan. “Ngi khmih lynti ba lada mih kino kino ki jingduna ne jingdkoh yn lah ban shimkhia noh mardor bad ka sorkar kadei ban pynbeit ia ki” la pynkut u Bah William.