Kiew 2000 tam ba iap, mynsaw 4 hajar ba khie jumai ha Myanmar

Palat 2,000 ngut ki briew ki la ïap bad 3900 ngut ki la mynsaw na ka jingkhie jumai ha Myanmar ha 28 tarik Lber, ki nongiarap ryngkat ki ksew ban sma ki dang iakhun ban wad bad pyllait im ïa ki briew ba shah tap na ka jingtwa ki iing bad ki jingtei ba bun mala. Ka video ka la mih ha ki social media kaba pyni ia kawei ka tymmen bad ki arngut ki khun ksiew jong ka kiba dang samla kiba la sahkut hapoh ki thliew jong ka iing ba twa. Ki khynnah kynthei ki la ring dur ia lade bad pyrta ban pan jingiarap katba ki dang pyndonkam da ka wait ban pynpra ka kynroh ban laitim bad ban ioh jingiarap na ki kynhun. Kumjuh 2 ngut ki khynnah kynthei bad ka kmie tymmen jong ki, ki shong sngap jar katba ki dang sahkut hapoh ki thliew ha ka jingkhynñiuh jumai. Hadien ka ioh ban pyllait im ia ki katba bun kiwei ki dangjah rngai.

“Ka dohnud jong nga ka pang haba nga pyrkhat ia ka jingtieng jong ki-ka jingkhia kaba pynkhih, ka jingkyrhuh kaba sngewsih ban wad ia ka Iyer ha ka por ba khynñiuh jumai kaba pynjot ia ka Myanmar” ong kawei ka lanot. Katba lai ngut ki sahkut hapoh thliew haduh 15 kynta shwa ba ki nongpyllait im kin ioh tan ia ki sha ka jaka ba shngain. Arngut kiwei pat ki kynthei ki la mad ïa kum kane ka jingma ban ap san kynta na ka bynta ki nongpyllait im ban lap ïa ki hapoh na ki jingtwa ka hotel jong ki ha Mandalay. Kine ki arngut ki bym kwah ban pynpaw kyrteng, ki la iathuh ia ka jingeh jong ki ha ki nongthoh khubor.

“Ngi la sah ha ka jingdum tliw, hynrei donbok ngi la don ia ka phone bad ngi lah ban pyndonkam ia ka jingshai ban iohi. Lada ngim don phone, ngi lah ban iap. Ngi lah ban iohi ban pynkhuid ia ki thliew na jrong iwei ia iwei pat,” la ong kawei na ki kynthei. “Katba ngi dang sah kut, ngi la ïoh jinghikai ba ym don kaei kaei kaba neh, bad kaba kongsan tam ban leh shwa ban ïap ka long ban im ka jingim kaba suk bad ban leh bun ki kam kiba bha. Wat leh ïa ki kam kiba sniew, namar ka karma kan bud ïa phi,” la ong kawei ka kynthei. Hynrei ryngkat bad ki jingpyllait im ba phylla, ki khana shaphang ki jingduhnong ba shyrkhei ki la saphriang kylleng ka Myanmar. Ar spah ngut ki monk Buddhist ki la shah tap ha ka iing niam ba la twa, sanphew ngut ki khynnah ki la iap ha kamra klas, bad hynriew spah ngut ki Muslim ki la sahkut katba ki dang duwai ha ki mosque na ka bynta ka Ramadan.