Iasoi MoU ka sorkar ban pynrung ktien Khasi bad Garo ha ka Bhashini App

Ka Sorkar Jylla kala iasoi ia ka soskular (MoU) bad ka Digital India Bhashini Division, Ministry of Electronics and Information Technology (MeitY) jong ka Sorkar India, ban pynrung ia ka ktien Khasi bad Garo ha ka rynsan BHASHINI App. Ia kane ka soskular la iasoi da u CEO ka Digital India Bhashini Division u Amitabh Nag bad u Commissioner Secretary, IT Department u Pravin Bakshi ha kaba la don ryngkat u Myntri Rangbah ka jylla u Conrad Sangma bad u Myntri ka Arts & Culture u Bah Paul Lyngdoh, ki nongialam jongka Khasi Literature Society, ka A’chik Literature Society bad kiwei kiwei. Ka BHASHINI, ka dei ka prokram jong ka Digital India Programme ban pynrung ia ki ktien ha ki kor teknoloji khnang ba ka pyrthei kan tip bad ba kin lah ban sngewthuh ne nang ban kren bad ki la don haduh 22 tylli ki ktien jong ka Ri India kiba la rung hapoh kane ka prokram.

Kumta da ka jingpynrung lang ia ka ktien Khasi bad Garo, kan pynlong ia ka Meghalaya kum kawei na ki Jylla ba lah ban shem ia ka ktien ka thylliej ha ka kor Digital hapoh ka Ri. Kum shibynta jong ka jingsdang ia ka jingpyntreikam, la thaw ia ka State Language Mission na ka bynta ka Bhashini hapoh ka jingialam jong u Chief Secretary u Bah D.P Wahlang bad kane ka Mission kan pynthikna ia ka jingpyniasoh kaba khlem jingeh, ka jingwad bniah, bad ka jingpynroi ia ki ktien Garo bad Khasi lyngba ki kor digital, kynthup ia ka jingpynrung ia ki dak thoh ba kyrpang bad ki jingpher kiba iadei bad ka ktien ka thylliej.

Haba kren ha ka jingialang, u Conrad K Sangma ula pynpaw ia ka jingsngew sarong da kaba ong “Mano ban poi pyrkhat ba shisien ka sngi, lyngba ka bor jong ka Artificial Intelligence, ban ngin lah ym tang ban pynkylla ktien ia kaei kaba ngi kren ne mut da ka kor digital?. Ka teknoliji mynta kala poi ha kawei pat ka kyrdan kaba ym ju don ba poi pyrkhat satia. Kane ka sienjam kan wanrah ia ka jingkylla ha baroh ki liang jong ka imlang sahlang bad ka synshar ka khadar, naduh ka iakren iakhana ha ki shnong ki thaw sha ka jingpynkhlain ia ki kam jngohkai, ka jingsengkam, ka pule puthi bad wat ha ka liang koit ka khiah.