Ka kam rep Sohshan ka dei kaba pyniohnong bha ia ki nongrep

Ban nang kyntiew ia ka ioh ka kot jong ki nongrep sohshan ne  Strawberry ha Ri Bhoi District bad ha kiwei ki district jong ka jylla khamtam ban rah ruh ia ka nam jong u soh strawberry, ki bor ka sorkar jylla Meghalaya ha ka jingiatreilang bad ka tnad Tourism ka la pynlong ia ka tamasa pyninam ba ar sngi ia u sohshan bad kiwei ki jingpynmih na u soh strawberry ha shnong Sohliya, Umsning C&RD Block, Ri Bhoi District. Ia kane ka tamasa pyninam ia u soh strawberry kaba la long mynta ka 2 tarik Jymmang bad 3 tarik Jymmang, ka jingangnud jong ka sorkar jylla ka long ban nang wanrah ia ka jingithuh kaba kyrpang ia u soh strawberry, ka rukom rep kaba itynnad bad ruh ka jingkyntiew ha ka kam jngohkai pyrthei, ha kaba ki nongwan ia shimbynta kin ioh ruh ia ka lad ban kheit ia u soh strawberry, ban mad ia u soh, ki umsoh bad kiwei kiwei ki jingpynmih na ka jingsain ia u soh strawberry. Na ka liang u Deputy Commissioner ka Ri Bhoi District u Abhilash Baranwal, kum u kongsan, u la ai ka jingiaroh ia ki bor ka sorkar jylla lem bad ka tnad Tourism kiba la nang iai bteng ban pynlong ia kum kine ki tamasa ban rah ia ka nam jong u soh strawberry kaban long ruh ka jingkyntiew ia ki nongrep bad ruh ia ka kam jngohkai pyrthei ha ka jylla.

U la ai ruh ia ka jingiaroh, ia u Bah Ostander Lyngkhoi, u ba long u wei na ki nongrep soh strawberry ba la paw ha ka jylla Meghalaya, halor ki sienjam jong u ban nang kyntiew ia ka kam rep soh strawberry, da kaba bynrap ruh ba ka kam rep soh strawberry ka long kaba pynioh nong bha bad kaban kyntiew shikatdei eh ia ka ioh ka kot jong ki nongrep. “Na ka liang ki bor ka sorkar jylla ka la nang pynmih ia ki lad jingiarap kiba bun ban kyntiew ia ka rep ka riang ia u soh strawberry bad ruh ban wanrah ia ki lad ban kyntiew ia kane ka kam rep, kum ka drip irrigation bad ki tiar ki tar kiban pyndonkam ha kane ka kam rep soh strawberry”, ong u Baranwal, da kaba bynrap ba watla ki don shibun ki jingeh, kum ka jingpynmih ia u soh ba biang (quality planting) bad ruh ha kaba ia dei bad ka iew ka hat hynrei kum ki nongrep kim dei ban duh mynsiem. Na ka liang u Bah Ostander Lyngkhoi u wei na ki riew rangbah ba la paw ha ka kam rep soh strawberry bad kum u Rangbah Shnong ka Sohliya, u la iathuh ia ka jingiaid lynti ka jong u ha ka kam rep soh strawberry ha kaba u la sdang da kaba seng kam rep tang 80 hajar tyngka hynrei namar ka jingtreishitom lyngba ka kam rep soh strawberry mynta u la lah ban iohnong da ka dor kaba heh bad u kheiñ ba ka kam rep soh strawberry ka dei ka kam rep kaba pynioh nong bha ban ia kiwei kiwei ki kam rep.

U la iathuh ruh, ba ha ka shnong Sohliya, ka kam rep soh strawberry ka la sdang ha u snem 1988 lyngba ki 50 tylli ki symbai kum ka jingpyrshang ia ka kam rep soh strawberry, hynrei naduh u snem 2004, hadien ka jingwanrah ia ki lad kiba thymmai ha ka kam rep soh strawberry mynta ka them Ri Bhoi District ka la lah ban pynmih kumba 175-280 ton u soh strawberry bad ka dei ka kam kaba iohnong bha ia u nongrep.