Buh thong ka sorkar ban kynjoh 20 lak ki nongwan jngohkai pyrthei

U Myntri ka tnad kam jngohkai ka jylla u bah Paul Lyngdoh u la ong ba ka sorkar jylla ka khmih lynti ba hapoh une u snem, ka jingwan poi ki nongjngoh kai pyrthei ha kane ka jylla ki dei ban poi sha ka 20 lak ngut. Haba kren sha ki lad pathai khubor hynne ka sngi u bah Paul ula ong, “ Da ka jingdon ka suk ka sain bad da ka jinglah ban bei tyngka ha ka kam jngohkai ngi khmih lynti ba ngi dei ban lah ban kynjoh sha ka 20 lak ka jingwan poi ki nongwan jngohkai ha jylla mynta u snem”. U Myntri ula pyntip ba ka tnad ha kine ki taiew ban wan kan sa lah ban pyllait ia ka Almanak (Calendar) jong ka kam jngohkai pyrthei.

U bah Paul ula iathuh ba tang ha kane ka sngi Palei ka Parliamentary Committee ruh kala wan jngoh ia ka Meghalaya bad ki la sah haduh 3 sngi bad ka jingwan poi ki khlur ba pawnam ka ri kum u Sachin Tendulkar kan nang khring shuh shuh ia kiwei ki nongshangkai ri ha kane ka jylla. U Myntri ula iathuh ruh ba na bynta ban kyntiew ia ka kam jngohkai, ka jylla hapoh ka Special Assistant to State for Capital Investment ka la ioh ia ka bhah tyngka kaba T.276 klur tam na bynta ban pyntreikam ia ar tylli ki projek ha kane ka jylla.

“Na bynta ka Mawkhanu Tourism Project New shillong ka jylla ka la ioh T.103 klur bad na bynta ka projek ban pynwan dur ia ka Umiam project ka la ioh T.120 klur,” ong u bah Paul.