Plie iingskul bad Ambulance u MLA ka Umroi ha Mawtneng

Ki nongialam shnong lem bad ki nongshong shnong ka Mawtneng mynta ka sngi ki la pynpaw ia ka jingkmen bad jingsngewnguh kaba khraw hadien ba u MLA ka Umroi Constituency u Bah Damanbait Lamare u la leit ban aiti noh ia kawei ka kali kit nongpang (Ambulance) bad ban plie ruh ia ka iingskul ha katei ka shnong. Ia kane ka ambulance lem bad ka iing building school ha Mawtneng la mang lyngba ka scheme jong ka Chief Minister Special Development Fund (CMSPF). La sakhilang ha kane ka sngi, da u Bah Forster Sohiong, Rangbah Shnong Mawtneng, Kitbok Kharlukhi, Secretary Shnong, u Pastor R.S Lamare, ki riew Rangbah bad ki nongshong shnong.

Na ka liang ki nongialam shnong hadien ba la ioh ia kine ki kam pynroi ki la ai khublei kyrpang ia u MLA u ba la iohi jngai ia ka jingdonkam u paidbah ha ka shnong Mawtneng khamtam ka kali kit nongpang ban pynsuk haba kit ia ki nongpang khamtam ruh ia ka building iingskul ban pyniar ia ka jingnang jingstad hapoh ka shnong ka thaw. Shuh shuh ruh ki nongialam shnong ki la ai ruh ia ki kyntien iaroh ia u Bah Ngaitlang Dhar, u MLA barim Umroi Constituency, da kaba ong ba dei naduh ba wan iuhkjat u Ma Ngaitlang ka Umroi ka la pher nadong hadong ha ki liang ka roi ka par, khamtam ki lynti ki synkien bad kiwei kiwei.

U Bah Damanbait Lamare, kum u nongmihkhmat paidbah ka Umroi u la pynpaw ia ka jingkmen ban pynurlong ia ka jingangnud jong ki nongshong shnong ka Mawtneng ban pynioh ia kine ki lad jingiarap da kaba ong ruh ba kum u nongmihkhmat paidbah un nang bteng ban shakri kham bha ia ki shnong ki thaw hapoh ka Constituency. Shuh shuh ruh, u la kyntu ia ki bor pyniaid shnong ba ki dei ban ri ban sumar bha ia ki khnang ba ki paidbah nongshong shnong kin ioh ia ka jingmyntoi kaba kham neh slem.