Dawa ki nongtrei 108 ban ithuh kum ki nongtrei sorkar ba pura

Ki nongtrei 108 hapoh ka shatri jong ka Meghalaya EMRI Worker’s Union hynne ka sngi ki la dawa ba ka sorkar ka dei ban ithuh ia ki kum ki nongtrei ba pura khnang ba kin ym duh ia ki jingmyntoi ba ki dei ban ioh. Haba kren sha ki lad pathai khubor u President ka kynhun u bah Roypar Kharraswai u la ong ba ka jingai jingshakri jong ka 108 hapoh ka Jylla ka la kynjoh mynta sha ka 18 snem hynrei kaba sngewsih ka long ba ki ioh tang ia ka tulop bad kim shym la ioh ia kiwei pat ki jingmyntoi kum ka Health Insurance.

U bah Roypar ula pynpaw ia ki jingeh ba ki nongtrei ki iakynduh bad ula bynrap ba naduh ba ka sorkar ka la weng noh ia ka GVK ha u snem 2022, ka sorkar ka la aiti noh ban pyniaid ia kane ka kam ha ka National Health Mission (NHM) tang na ka bynta lai bnai, hynrei haduh mynta ka NHM ka dang bteng. Katba na ka liang ka Kong Microlina Syiemlieh, kaba dei ka Spokesperson jong ka Union ka la ong ba ha ka jingtreikam ka don ka jingbym beit namar la pyniaid ia ka kam da u briew shimet ia uba la tip kyrteng kum u Bah Kmenlang Khongwir uba dei u Project Manager.

Ka la dawa dawa ba ka sorkar kadei ban weng noh ia u Bah Kmenlang Khongwir na kane ka project bad ba ka sorkar kan peit hi nadong shadong. Shuh shuh ka la iathuh ruh ba ia kane ka project, la aiti sub contract ruh ha ka Shishupal kaba pyniaid da ki riew shimet kaba la thung briew katba ka sngewbit.