Ym ïahap ki trai nongñiah bos dieng ba phah die mar jot ka sorkar

Ka rai jong ka sorkar jylla ban ym shah iaid shuh ia ki kali rim kiba la 35 snem shaneng, ka la wanrah ka jingkhuslai bad ka sngew pyrshah jur na ki trai bad ki nongñiah bos dieng kiba kamai ban shakri ia ki nongleit nongwan ha ka nongbah bad shabar ruh kumjuh. Dang shen, ka sorkar jylla ka la mynjur ia ka Vehicle Scrappage Policy ha kaba ki kali shimet kiba la 35 snem bad ki kali sorkar kiba la 15 snem kim ym lah shuh ban iaid ha surok khnang ban pynduna ia ka jingjaboh ka lyer, bad ka jingpyndonkam ia ka petrol bad ki dei ban aiti ne die noh sha ki kompeni ban lah ban pyndonkam biang ia ki tiar. Kumba 8 hajar ki kali shimet bad 5 hajar ki kali sorkar kiban hap die marjot noh katkum ka jingkhein kaba la leh ka sorkar. Haba kren bad ki trai bad ki nongniah bos dieng mynta ka sngi, kila pynpaw ba kane ka rai ka sorkar ka la long kumba pynduh kam pynduh jam ia ki, kiba im ja na kane ka kam.

U bah George Laurence Kurbah u nongkitkam ka Shillong City Bus Syndicate, u la ong ba kine ki bos dieng kidei kiba la ai jingshakri ia ki paidbah naduh u snem 1958 bad ka rai ka sorkar ban shu pynkylla mar jot ia ki kali kiba la iaid la palat 35 snem, ka long kumba shu knieh noh ia ka pliang ja jong ki nongkamai ja kpoh kiba la im na kane ka kam. Katkum ka jingiathuh u bah Kurbah kine ki bos haduh mynta ki dang neh bad ki dang bha namar ba ki trai kali ki ia sumar bad ki pyllut da ka phew da ka lak man u snem na bynta ban pynbha ia kine ki kali.Dei na kane ka daw, ba ki neh bad kim ju pynthut haba leit ba wan, bad kila pynbiang ruh ia ka test ka pollution, bad kiwei, ym ki bos saw kiba la mih bad jah noh shiphang. “ Kine ki bos dieng mynshwa ki don 146 tylli  kiba shakri ia ki paidbah ha kylleng ki jaka Bhoi, Mylliem, Mawngap, Smit, Mawpat, Tynring bad kiwei ki jaka bad ki la mih naduh u snem 1958 ha ka por ba don ha ka sorkar Assam, hynrei mynta ki don sa tang kumba 40 tylli eiei kiba kamai sha Smit, Tynring,” ong u bah Kurbah.

Ki Trai bad ki nongniah kali kiba la kamai da ki phew snem ha kane ka kam, ki la iathuh ba ki im ja bad ki buh skul khun tang na kaba kamai ia kine ki bos dieng. Ki la pynpaw ka jingpyrshah jur halor ka jingthmu ka sorkar ban nym shah shuh ban iaid ia ki kali kiba la palat ia ka 35 snem. Ki la ong ba ka kali kam rim namar ki pynbha lut nadong shadong hynrei ka rim tang ka kot kali namar ba kim ioh shuh ia ki permit thymmai. “Ngi sngewsih lada ki pynduh noh namar ki kali jong ngi, kim dei kiba sniew namar ba ngi ju bujli bad pynbha man u snem ia ki kali bad ka jingpyllut ka long da ki T.3 ne T.4 lak ha ka shi snem,” ong ki nongniah kali kamai. Ki la ong ba ka jingkamai ha kine ki sngi ka la hiar bha namar ba la mih bun ki kali bad ka jingsahkut hynrei ka ka kham thnem bha ka jingioh kamai ha ka por tlang namar ba ki briew ki leit iaid kai, da kine ki bos.