Mynjur ka ‘High-Level’ Meghalaya-Assam ban wanrah ka shongsuk ha Lapangap

Ka jylla Meghalaya bad Assam hynne ka sngi ka la rai ban pynbeit ia ka jingiakynad pud ha Lapangap, khnang ba ki nongrep na Lapangap bad ki nongrep na Tahpat, Karbi Anglong kin ioh rep da kaba suk khlem ka jingkulmar. Ia kane ka rai, ki ar tylli ki sorkar jylla ki la shim ha ka jingialang High-Level ba kynthup ia ki nongmihkhmat na ka sain pyrthei, ki Heh Ophisar bad ki Pulit nalor ki nongkmihkhmat na ki District Council ka Meghalaya bad Assam, kaba la pynlong ha Assam Police Camp. Kane ka jingialang ka dei kaba la pynlong kum ka jingpynbteng ia ka sienjam ba la shim da u Myntri Rangbah ka Jylla Conrad K Sangma, uba la leit iakynduh bad iakren bad u Myntri Rangbah ka Assam Himanta Biswa Sarma, da ka jingthmu ban wad ia ki lad ki lynti ban lah pynbeit noh ha ka lynti ba jai jai ia ka jingeh kaba mih ha ka thain Lapangap. Ha kane ka jingialang la rai ba baroh arliang mamla ki dei ban pynneh ia ka jingshongsuk shongsain bad ki dei ban kiar ruh ban leh ia kino kino ki kam kiba lah ban pynmih ia ka jingkulmar lane ktah ia ka jinglong jingman ka suk ka sain.

Katkum ka jingpyntip u Deputy Commissioner ka West Jaintia Hills, ka jingialang ka la mynjur ba ki nongshongshnong ka Lapangap kin bteng biang ban rep kba ha kjat jong u lum uba mih ka jingiakajia. U iathuh ba katba ki nongshongshnong ka Tahpat pat, ki lah ban bteng ia ka jingrep ia ki jingthung ba iaid kat kum ka aiom kum ka kait, sohtrun, sying bad kiwei ki jingthung halor u lum bad ki sharing lum. Haba iadei bad ka kam ban pynbeit bad phiah ia u pud u sam ba shirta ha ka jaka ba don jingiakajia, u Deputy Commissioner u iathuh ba ia kane ka kam la mynjur ban sa shong pyrkhat bad shim rai da ki Committee bala thung da ki Sorkar Jylla. Kiba mihkhmat ia ka Meghalaya ha kane ka jingialang ki long u Symbud Myntri Rangbah Bah Sniawbhalang Dhar, Principal Secretary Bah Frederick R Kharkongor, Commissioner & Secretary Bah Cyril V Diengdoh, Secretary Bah Garod LSN Dykes, Chief Executive Member ka JHADC Bah Thombor Shiwat, Deputy Commissioner ka WJH Abhinav Singh bad u Superintendent of Police ka WJH Jagpal Singh Dhanoa.

Kiba mihkhmat ia ka Assam ki long u Dr. Tuliram Ronghang, MLA bad Chief Executive Member ka Karbi Anglong Autonomous Council (KAAC), u Member of Parliament Amarsing Tisso, Additional Chief Secretary (Home & Political) Ajay Kumar Tiwari, MLA bad Executive Member ka KAAC Surjya Rongphar, MLA bad EM ka KAAC Lunsing Teron, ki MLA Habbey Teron bad Niso Terangpi, Deputy Speaker ka KAAC Avijit Kro, ka Deputy Commissioner ka West Karbi Anglong Preeti Kumari bad Superintendent of Police, West Karbi Anglong Dinesh Kumar.