Ïoh sei metiap Rangbah na krem dewiong hajan ophis DC

Ka State Disaster Response Force (SDRF) hynnin ka sngi, ka la ioh sei kawei ka metiap uwei u briew uba hap katba u dang leit tong um na kawei ka krem dewiong ba la shu ieh shrah hajan ka ophis treikam barim u Deputy Commissioner ka East Jaintia Hills District ha Khliehriat hadien 6 sngi ba ula jah rngai.

U Senior Staff Officer & PRO jongka Civil Defence & Home Guard u Bah Paul Shylla ula pyntip ba ka kynhun jong ka SDRF kala ioh sei ia kawei ka metiap jong uwei u briew uba la don 41 snem ka rta, na kawei ka krem dewiong kaba la ieh shrah bad ia kane ka metiap la ioh ban sei hadien hynriew sngi ka jinghiar bad jingpyrshang ban wad ia ka met ha katei ka krem.

U Bah Paul Shylla ula pyntip ba ka 1st SDRF Battalion kala hiar sha Khiehriat ha ka 27 tarik Jymmang halor ka jingioh khubor na ki bor pyniaid district, ba uwei u briew ula hap shapoh kane ka krem bala iehshrah ha ka 26 tarik Jymmang, katba u dang pyrshang ban tong umdih bad kane ka par kadei kaba don ia ka jingjylliew haduh 120 phut eiei.

Ka kynhun jong ka SDRF ka la leit mardor sha katei ka jaka hynrei namar ka jingdum ka suinbneng bad ka jingbym long shngain ka jaka, ka jingpyrshang ban sei ia une u briew kam shym la lah ban urlong hi ha katei ka sngi namar ba ka kynhun kala mad ia ka jingeh kaba khraw naba kane ka par kadei kaba la dap um kumba 40 phut eiei, kaba buh ha ka jingeh ia ka kynhun ban ioh sei ia une u briew.

Kiba haiing hasem jong une u briew ryngkagt bad ki nongshong shnong ki la wan ban ai jingkyrshan ban pynieng bad ban pyndait ia ki tiar ki tar ban tan ia ka um khnang ba yn lah ban leit wad bad ban sei ia ka metiap.

U Bah Paul ula pynpaw ha ka 1 tarik Jylliew ha ka por 6:30 baje mynstep, 4 ngut ki shipai SDRF ba la synran da 2 ngut ki trai shnong, ki la hiar sha kane ka par ban wad ia ka met bad ha ka por 9 baje kila lap ia ka metiap bad ki la ioh ban sei sha ryngkew bad hadien kane la aiti noh sha ki pulit ba kin leh ia kaba donkam katkum ki kyndon aiñ.

Ka SDRF ka pynpaw ia ka jingsngewlem ia kiba ha iing ba hasem kiba la duh noh ia la u baieid bathoin bad ka pynpaw ruh ia ka jingsngewnguh ia ka jingai jingkyrshan kaba kordor jong ki nongshong shnong ha ka por ba pynlong ia ka jingwad bad ban sei ia ka met sha ryngkew.