Iakynduh u Conrad bad ki nongialam-shnong-sengbhalang na bynta ka roi ka par

U Myntri Rangbah ka Jylla u Conrad K Sangma mynta ka sngi ula kynduh ia ki seng bapher bapher, ki nongialam shnong bad bun ki kynhun ha iingsah ha Shillong ban iakren ia ki kam na bynta ka bha ka miat, ka roi ka par, ka ioh kam ioh jam, ki karkhana, ka pule puthi bad ki jingmyntoi ka imlang sahlang.

Kine kiba la wan iakynduh ia u Myntri Rangbah ki kynthup ia ki nongmihkhmat na ka KJP Synod Sepngi bad ka Mawphlang Presbytery, ka Holy Eucharist Chuch, ka Lou Majaw Foundation bad u nongshna jingshna da ki dieng u Bah Gilford Pde na Jowai. Ka jingiakren kala iaid halor ki kam ba iadei bad ki Jingiaseng, ki prokram ba iadei bad ka deiriti, ka jingkyntiew ia ka mattithaw bad jingshna kti, ki kam iada mariang bad ki jingkyrpad ia ka jingkyrshan na ka Sorkar.

U Myntri Rangbah ula iakynduh ruh ia ka kynhun na ka Meghalaya ASHA Workers Union, ka All Meghalaya Grade IV Government Employees Association, Meghalaya Election Enumerators’ Service Associaton (MEESA) bad ki Nonghikai ba leit hikai pyntbit ha DIET. Kine ki kynhun kila pynsngew ia ki jingeh ba iadei bad ki sienjam halor ka bha ka miat, ka honorium, ki kam ba iadei bad ka jingshakri, ki jingdonkam haba iadei bad ki jingtei, ki jingsngewkhia halor ki kam ba iadei bad ki jingialehkai, bad ka education stipend ba sahteng.

Ki Nongmihkhmat ka Bosco Integrated Development Society kila batai ia u Myntri Rangbah halor ki kam pynroi kiba dang iaid bad ki project ka umlang sahlang bala pyntrei ha kylleng ki bynta jong ka Jylla.

U Myntri Rangbah ula iakren ruh bad ka Meghalaya Poultry Farmers and Welfare Associaton, All Khasi Hills A’chik Federation, Khasi Jaintia Government Contractors and Suppliers Association, Jaintia Cement Manufacturer Assocation, Hynniewtrep Youth Development Council bad ka Hynniewtrep Border Dispute Redressal Forum.

Ki jingiakren ki iaid halor ka jingpynioh kam ioh jam, ka jingkiew ha ki kam karkhana, ki jingsngewkhia ba iadei bad ka rukom thungkam, ki jngeh jong ki kontraktor, ka bha ka miat ki nongtrei bylla, ka lad iohkam iohkam ki samla bad ki kam ba iadei bad ki shnong khappud.

U Myntri Rangbah ula kular ia kine ki kynhun ba ka Sorkar ka dang iai bteng ban iakren bad ki kynhun ha ki kam bapher bapher bad kan sa shong bishar ia ki mat bad ki jingsngewkhia ba kila pynsngew ha kine ki jingiakynduh. Ula iai ban ia ka jingpynleit jingmut jong ka Sorkar halor ka roi ka par ba kynthup lang ia baroh, ka synshar khadar kaba sngap bad ka jingiai bteng ki jingiakren bad ki nongshongshnong bad ki seng bapher bapher ban leh eiei halor ki jingeh bad ban pyniaid shakhmat ia ki jingthmu ka Sorkar ha ka roi ka par.

Kine ki jingialang kila long shibynta jong ki jingpyrshang ba iai bteng jong ka Sorkar ban iai don ki jingiakren bad ki kynhun bapher bapher ka imlang sahlang bad ban pynthikna ba ka Sorkar kala sngao ia ki jingeh u paidbah bad leh eiei ia ki lyngba ki jingiasyllok kiba tei.