Lum jingialang ka Sorkar bym ioh skhim MDC ha ki jaka sor na ka 15 Finance Commission

U Symbud Myntri Rangbah ka Jylla u Bah Prestone Tynsong uba khmih iaka tnad District Council Affairs (DCA) hynne ka sngi ula lum ia ka jingialang bad baroh 3 tylli ki Autonomous District Council (ADC) ka jylla ha kaba iadei bad ka jingbym ioh ia ka skhim na ka sorkar pdeng ban pyntreikam ha ki jaka kiba don ha sor. Haba iakren bad ki nongthoh khubor hadien ba la wai ka jingialang, u Bah Prestone Tynsong ula ong ba ka sorkar jylla kala shim ia ka rai ban pynkhamti ha ka Tnad Urban Affairs ban wad ia ki lad ki lynti ban pynthikna ba ki constituency jong ki District Council kiba hap ha ki jaka sor, kin ioh ban pyntreikam ia ka Tied bad Untied Grant jong ka 15th Finance Commission. “Ngi la rai ban pynkhamti ia ka kam ha ka Tnad Urban Affairs  ba kan wad ia ki lad ki lynti ban leh eiei ha kaban pynthikna ba ki constituency jong ki MDC kiba don ha ki jaka sor jong ka jylla kin ioh ban pyntrei ia ka Tied bad United Grant kaba la ai da ka 15th Finance Commission bad nga la dep bthah ia u Commissioner & Secretary ka Tnad DCA ba un iakren bad ki lai tylli ki District Council bad nga thikna ba ngin sa lah ban pyntreikam ia kane ka skhim wat ha ki jaka sor ruh” ong u Symbud Myntri Rangbah ka jylla.

Haba kylli la ka jingialang ka la shim ia kano kano ka rai ha kaba iadei bad kaj ingbuh por ban pyndep ia kane ka kam, u Bah Prestone ula ong, ba ki khlem buh por eiei hynrei  la bthah pat ba kidei ban leh kloi ia ka kam khnang ba yn ioh ban pyntreikam ia ki skhim lyngba ka 15th Finance Commission kaban kut ha u Lber 2026. “Ngi don sa tang katto katne bnai mynta. Ngi la dep ong ia ki, ba kin leh wut wut ia ka kam khnang ba ki MDC jong ki jaka sor ruh kin ioh lang ia kane ka skhim, kaba la phah da ka 15th Finance Commission” ong u Bah Prestone. Ula ong ba katei ka jingeh kala mih kadei tang namar ba ka sorkar pdeng kala pynmih ia ka Portal bad la pyntreikam Online noh ia kane ka skhim hynrei ha ki snem kiba la leit kadei kaba la shu pyntreikam Offline namar bay m pat don iaka Portal. Ula ong, ba mynshuwa namar ka jingbym don ka portal, ia ki skhim kiba la mang na ka bynta ki District Council la byntalang sha baroh ki MDC bad ym shym la buh jingkylli satia la ka jingpyntreikam kadei ha sor ne nongkyndong hynrei naduh ba la pynmih ia ka Portal kam shym la pdiang shuh ban pyntreikam ia ka skhim ha ki jak asor.

Ha kane ka jingialang kaba la lum da ka tnad DCA la wan ban iashimbynta da u CEM ka Jaintia Hills Autonomous District Council (JHADC) u bah Thombor Shiwat ryngkat bad ki MDC, u CEM ka Garo Hills Autonomous District Council (GHADC) u Albinush Marak ryngkat bad ki MDC hynrei u CEM ka Khasi Hills Autonomous District Council (KHADC) u Bah Shembor Rynjah ym shim la wan iashimbynta hi dalade ha ka jingialang hynrei ula phah mihkhmat da ki MDC jong ka Council. Hashwa ban sdang ka jingialang u Symbud Myntri Rangbah u Bah Prestone ula kylli la ki CEM jong ki 3 tylli ki ADC kila wan, ka jubab ka long ba kila ia poi lut, hynrei u EM ka KHADC u Bah Powell Sohkhlet ula pyntip ba u CEM ka KHADC ym shim la poi hynrei ula phah pat ia ki ban mihkhmat, kumta u Bah Prestone ula ong, ba u CEM u lah dei ban wan hi dalade ruh ha kane ka jingialang”. Lah ban ong, dang ha kine ki khyndiat sngi,  ka kynhun ki MDC ka KHADC bad JHADC na ka seng VPP hapoh ka jingialam u CEM ka KHADC u Bah Shembor Rynjah kila leit ud leit nam ha u Symbud Myntri Rangbah u Bah Prestone Tynsong halor ka jingbym ioh ki MDC ia ka skhim na ka 15TH Finance Commission hynrei kaba lyngngoh ka long ba ha ka sngi kaba u Bah Prestone ula lum ia ka jingialang bad baroh 3 tylli ki District Council hynrei u CEM ka KHADC ym shim la wan ban iashimbynta lang.Ha kane ka jingialang la iadonlang ruh ki heh ophsiar jong ka tnad District Council Affairs, tnad Urban Affairs bad kiwei kiwei.