Sdang ka ‘Sier Lapalang Operation, beh ka HYC ia 200 ngut ki nong bylla bar Jylla

Ka Hynñiewtrep Youth Council (HYC) hynne ka sngi ka la sdang ban khynra lane ka Sier Lapalang Operation (SLO) ia ki Nongbylla bar Jylla kiba trei ha ki Projek jong ka Sorkar Jylla kiba don ha New Shillong. Ha kane ka jingleit khynra ka HYC ka la lap ia ki 2 tylli ki jaka trei kiba dei ki Projek jong ka Sorkar Jylla kiba ka kam ka dang iaid shait shait bad ha ka jingkylli pyrthuh jong ki dkhot la lap ba ki don kumba 350-400 tam ki Nongtrei kiba dei ki bar Jylla ha kine ki jaka trei bad na kine kumba 200 tam ei ei ki bym don ia ki kot ki sla kiba biang. Haba ïadei bad kane ka HYC kala phah ba kin mih noh na kitei ki jaka treikam bad bthah ruh ia ki ba kim dei ban wan trei lada kim don ia ki kot ki sla kiba biang kum ka Registration card na ka Labour Department.

Ka HYC ka pynpaw ia ka jingsngew lyngngoh ba kumno kine ki 200 ngut tam ki Nongbylla ki ioh ban trei ban ktah hapoh kitei ki projek khlem da pynbiang ia ki kot ki sla kiba biang. Don napdeng jong ki kiba pyni tang ia ka ‘Acknowledgement Slip” ba ki lah aplai ia ka registration card na ka Tnat Labour bad khlem da ioh ia ka Registration card, ki lah da sdang ban trei bylla. Kane ka long pyrshah ia ka ain ba ka Sorkar Jylla ka lah shna ia ka ba lah tip kum ka  Meghalaya Identification, Registration (Safety & Security) of Migrant Workers Act, 2020 bad ka Meghalaya Identification, Registration (Safety & Security) of Migrant Workers Rules, 2020.“Katkum ka kyndon 4 jong ka Meghalaya Identification, Registration (Safety & Security) of Migrant Workers Act, 2020 baroh ki nongbylla kiba wan  na bar ka jylla (Migrant Workers) kidei ban register ialade bad ban da ioh ia ka Registration Card haba ki wan trei hapoh ka jylla Meghalaya bad lada ki pynkhein ia kane kin shah dain kuna. Kino kino ki briew kiba ai kam ia ki nongbylla bar jylla ki dei ban pynthikna ba kita ki nongbylla bar jylla kin da register ban ioh ia ka registration card bad lada ki pynkhein ia kane ki lah ban shah dain kuna” la ong ka kyrwoh.

Na ka liang Seng ka pynrem jur ia ka jingshim sting jong ki Tnat treikam ka Sorkar Jylla ki bym shimkhia ban pyntreikam ia ki kyndon ain kiba ka Sorkar hi ka lah shna bad kane ka lah ban buh jingma shi katdei eh ia ngi kum ka Jaidbynriew ritpaid bad kumjuh ruh ka lah ban ktah ia ka shongsuk shnongsain ha ka Jylla hi baroh kawei namar ba kumba paw hi ki dak ki shin ki lah ruh ban don wat ki Bangladeshi ki ban rung bad riehtngen ha kum kine ki jaka trei kiba bun paid bad hadien katto katne kin sa mih pat ban leh ia ki kam beain kiba bunjait ym tang ha ka Jylla hynrei ha Ri India hi baroh kawei. Haba ïadei bad kane ka HYC ka pyntip ba kan nang pynjur ban khynra ia ki Nongbylla bar jylla ha kylleng ka Ri Lum Khais-Jaintia nangne shakhmat ruh bad lada ngi lap ia ki bym don ki kot ki sla kiba biang.