Ka jingkhang khyrdop lum khajna KHADC katkum ka ain: DC

Shisngi hadien ba la mih ka jingkynthoh na ki Executive Member jong Khasi Hills Autonomous District Council (KHADC) ba la lamkhmat da ka party The Voice of the People’s Party ha kaba ia dei bad ka jingkhang ia ka khyrdop khrong khajna ba la aiwai da ka District Council ha Umdihar Ri Bhoi District, u Deputy Commissioner kane ka district u la pynshai ba la khang ia katei ka khyrdop hadien ka jingbud thik ia ka kyndon ain ym ba la leh da ka bor ne bym burom ia ka District Council. Haba kren sha ki Nongthoh Khubor, u Deputy Commissioner Abhilash Baranwal, u la iathuh, ba ki bor pyniaid district hadien ba la ioh jingujor na kiba bun ki la shim ia ka rai ban khang ia ka khyrdop khrong khajna jong ka KHADC ba la ai wai sha u riew shimet kaba la pyntreikam ruh harud u surok bah National Highway, kaba long beaiñ katkum ki kyndon ain ka sorkar jylla.

Lah ban kdew, ba dang shen u EM ba dei khmieh ia ka Land Development and Information and Technology u Bah Powel Sohkhlet lem bad u Bah Winston Tony Lyngdoh EM incharge jong ka Trade Trade, Enforcement, Labour Clearance Certificate bad Revenue Collection ki la pynpaw ia ka jingsngewkhia da ka kynnoh ba ki bor district ka Ri Bhoi ki la pynibor da kaba khang khyrdep ia katei ka khyrdop khrong khajna ba la aiwai da ka KHADC sha u wei u riew shimet bad kane ka jingleh jong ki bor district ka pynpaw ba kim burom satia ia ka iktiar jong ka District Council. Haba jubab halor katei ka jingshah kynthoh, u DC ka Ri Bhoi District, u la ong, ba la shim ia ka sienjam ban khang ia katei ka khyrdop khrong khajna da kaba bud thik ia ka kyndon ain jong ka sorkar jylla ba la pynbna ha u snem 2021 ba la mana ia ka jingpynieng khyrdop khrong khajna ha kino kino ki surok bah National Highway ne surok PWD jong ka jylla Meghalaya.

“Ngi khlem leh pyrshah ne don ka jingthmu ban nym burom ia ka iktiar jong ka KHADC namar ka dei ka jylla kaba don ia ka 6 schedule, hynrei ka jingkhang ia katei ka khyrdop ka dei hi ba bud ia ki kyndon ain”, ong u Baranwal, da kaba bynrap ruh, ba wat ha ka work order jong ka KHADC ba la ai sha u riew shimet ban pyniaid ia katei ka khyrdop la thoh shai ban mana ha ka jingthoh kaba 6 ba ym shah iano iano ban pynieng ne pyntreikam ia ki khyrdop ha ki bynta u surok bah, kata kaba shai ia baroh, u la ong.