Kyntait ka NPP ba leit Delhi 24 ngut ki MLA ban kynduh ia ki heh BJP.. lead

Ka National People’s Party (NPP) ka la kyntait halor ka jingsaphriang ka khubor ba ki don 24 ngut ki MLA ka NPP kiba leit sha Delhi ban kynduh ia ki nongialam ka BJP.

U Treasurer uba dei ruh u Political Secretary u Myntri Rangbah ka jylla, u bah Daniel Thangkhiew, ula kyntait ia kane ka khubor kaba saphriang ha rynsan social media kaba pynkyndeh ia ki briew ba ki 24 ngut ki MLA ka NPP ki kynduh ia ki nongialam ka BJP ha Delhi da ka jingthmu ban leit rung sha ka BJP ha Delhi.

U bah Daniel ula ong ba u Myntri Rangbah ka jylla bad baroh ar ngut ki Symbud Myntri Rangbah kynthup bah Prestone Tynsong bad bah Sniawbhalang Dhar, ki don ha Delhi na ka bynta ka kam sorkar, ym ia ka kam politik.

“Nga la iohi ia ki jingthoh ha ki rynsan social media kaba kam ba 24 ngut ki MLA ka NPP ki don ha Delhi ban kynduh ia ki nongialam ka BJP ban wanrah ia ka jingkylla ha ka sain pyrthei ha Meghalaya. Kine ki dei ki khubor bym shisha bad ka dei ka jingpyrshang ban ialam bakla ia ki paidbah ka Meghalaya,” la ong u bah Daniel da ka phone na Delhi.

U bah Daniel ula pynthikna ba ka NPP ka iatylli kawei bad bynrap ba u Myntri Rangbah u Conrad K Sangma ula kynduh ia ki MLA ka NPP ha Shillong ha kine ki khyndiat sngi ba la leit.

U la ong ruh ba ki MLA ka NPP bad ki MDC ki iatylli bad ki pylleit jingmut na ka bynta ban pynkhreh ia ka ilekshon MDC sha Garo Hills Autonomous District Council (GHADC).

Ha kajuh ka por ula ong ba ka jingleit rung BJP ki 8 ngut ki MLA ka UDP kam don eiei ka jingktah ia ka sorkar bad baroh ki don lang ha ka sorkar MDA-II.