Siat ki runar da ka jri ia ki Longkmie ba iaid pahara, pynrem ka Dorbar Shnong Mawkyrwat

Ka Executive Committee jong ka Dorbar Shnong Mawkyrwat ha ka Sngi Palei ka la pynrem jur ia ki katto katne ngut ki runar kiba la siat da ka jri ia ki dkhot jong ka Seng Longkmie Mawkyrwat katba ki dang iaid pahara ia ka shnong na ka bynta ka bha ka miat jong ka shnong.

Ka Executive Committee ka la pynpaw ruh ia ka jingsngewkhia halor ka jingroi jong ki kam sniew ba lai phew jait hapoh Mawkyrwat ha kaba dang shen ki runar ki la pyrshang ban prong bad pynjot ia ka dukan jong u Secretary VDP Mawkyrwat ha ka por shiteng synia.

U Secretary ka shnong Mawkyrwat, u Bah Newtonroy Lyngkhoi u la iathuh ba na ka liang jong ka shnong ka la iakynduh ia u Superintendent of Police, Bah B. Jyrwa halor kine ki jingjia bad ka la kyrpad ruh ia ka tnat pulit ba kan shimkhia ban kem mardor ia kiba leh ia kine ki kam sniew. “Ngi ai ruh ka jingmaham ia kine ki runar ba kin wan ban pyndem noh mardor ha ki bor jong ka ain, bad ngi maham ia baroh kiba ialeh pyrshah ia ki adong jong ka shnong Mawkyrwat ba nangne shakhamt lada ngi lap, ngin shim da kaba tyngeh,” ong u Bah Newtonroy.

U Bah Newtonroy u la iathuh ba kumba ka long mynta, ka shongsuk shongsngain bad ka jingsuk jong ka shnong ka la sdang ban wanphai biang da ka jingtrei shitom jong ki dkhot ka Seng Longkmie bad ki dkhot ka VDP, bad kumta ka Dorbar Shnong ka ai ia ka jingkyrshan ba pura ia kine ki seng jong ka shnong ba kin nang trei shitrhem ia la kajong ka kam.

Ha kajuh ka por, u Bah Newtonroy u la ai khublei ruh ia ka tnat pulit halor ka jingiatreilang bad ka shnong ban pynduh pyndam ia ki kam sniew, kiba don hapoh kane ka shnong bad ka dong ka thain.