Ioh jingsumar ei ki paidbah na ka “Health Camp” ka SURE

Ha ka jingai sumar ei ne free health check-up camp ba pynlong da ka Link Workers Project jong ka Society for Urban and Rural Empowerment (SURE), ha Amlarem Secondary School, Amlarem, kala long kaba pynmyntoi ia shibun ki paidbah ka thaiñ kynthup naduh ki khynnah skul. Ia kane ka free health check-up camp la pynlong haka 22/05/2025, bad la kyrshan daka Project Regeneration Meghalaya, bad ruh daka jingiarap lang ki nongtrei ka Jarain PHC hapoh ka jingialam u Dr. F. Lamin.  U Dr. S.N. Goswami, Chief Operating Officer ka Project Regeneration Meghalaya, nalor ba u batai pynshai halor kane ka project kumjuh ka thong jong ka, u ong ban pynwandur biang iaka khyndew bad ka mariang haka Jylla donkam ban thung ki dieng, u ong ruh ba bun ki sengkur kumjuh ki shong ki thaw haka Jylla kila sdang ban iatreilang bad kane ka  Project da kaba shah iaki ban thung iaki dieng ki seij haki jaka jong ki. Shuh shuh u ong kane ka project ka mang ban poi shaki paidbah ka Jylla, bad ka jingpynlong ia kane ka health camp ruh dei kawei ba ki lah ban leh.

U Rev. F. Pohshngap, Secretary jong ka Kur Pohshngap kaba dei kawei naki sengkur ba don bynta ha kane ka Regeneration Meghalaya Project hapoh ka thaiñ Amlarem haba iaroh ia kane ka Project u pynpaw ruh ka jingkyrmen ba kane ka project kan long kaba jop.  U Dr. F. Lamin, Medical Officer ka Jarain PHC, ula kren halor ka koit ka khiah da kaba batai ruh iaki jait jingpang ba shah ktah bha ki briew ka thaiñ. Haba  pynpaw ruh ka jingsngewkhia halor ka jingkiew sted ka jingpang HIV haka thaiñ Amlarem, ula batai pynshai ruh halor ki jingeh ba mih naka jingarmet  haka rta ba dangrit bad kyntu iaki khynnah skul ba kin long phikir bha ia kane. U Dr. Ajay Sharma, Director of Corporate and State Affairs at AstraZeneca India, u ong ba ka company jong ki ka sngewkmen bha ban don bynta ha kane ka Project Regeneration Meghalaya, kaba la pyntreikam hapoh ka Jylla  Meghalaya da kaba kyrmen ruh ba ka jinglah ban pyntreikam ia kane kan iarap ban iakhun iaka jingkylla ka suiñbneng.

U iathuh ruh ba na kane ka project 6 klur tylli ki dieng yn sa  thung haka Jylla. Hadien kane u Dr. Sharma ula leit jurip ruh iaka jaka thung dieng  ba don hajan  Amlarem, ba dei trai da ka Kur Dhar Sohtken,  nalor ba u iakynduh ruh ia i kong Duwan Dhar iba dei i nongpeit nongsumar ia katei ka jaka thung dieng. Kiwei pat ba ai jingkren ha kane ka sngi kynthup Coriniki Slong, District Resource Person, bad Banisha Lamar, Zonal Supervisor jong ka Link Workers Scheme kaba hap hapoh ka SURE.