Hadien 22 snem urlong ka jingkieng Phodthre, nalor ka surok Upper NN sha Mawkawah

Hadien 22 snem ba la sahteng, ka jingkieng Phodthre kaba pyniasoh ia ka Upper New Nongstoin sha ka shnong Tiehsaw ia kaba la khmih lynti ba kan iarap ban pynduna ia ka dheng kali ha sor Nongstoin, ka la lah ban urlong hadien ka jingshimkhia jong u MLA ka Nongstoin u Bah Gabriel Wahlang. Katei ka jingkieng kaba dei ruh ka lynti ban pyniasoh sha ka surok Highway Nongstoin – Rambrai la khmih lynti ba kan wanrah jingmyntoi ia ki paidbah kumjuh ia ki khynnah skul kiba hap ban kam lyngba na katei ka wah.

Ki jingurlong jong kitei ki project kadei hadien ba ka sorkar lyngba ka tnad PWD ka la mang tyngka haduh 5 klur 77 lak tam na ka bynta ka jingkieng Phodthre ryngkat ka surok ban pyniasoh, ka surok ba 90 lak tam na Upper New Nongstoin sha Mawkawah ryngkat ka parking lem bad kiwei de ki surok ha kiwei pat ki jaka ha sor Nongstoin. Na ka liang u Bah Gabriel Wahlang ha ryngkat ki ophisar ka tnad PWD ba kynthup ia u Bah S.Puweiñ, AEE, PWD Nongstoin , Bah D. Jyndiang, JE, Bah J.K Diengdoh, Sordar Upper New Nongstoin lem bad kiwei pat ki riew rangbah ki la leit ban jurip ia kitei ki jaka hashwa ban sdang ia ka jingpyntrei.

U Bah Gabriel u la ong ba ia kine ki project la dep ban mang tyngka bad shen yn sa sdang noh ban pyntrei na ka bynta ka jingmyntoi jong ki paidbah. Na ka liang jong ka shnong Upper New Nongstoin lyngba u sordar Bah J.K Diengdoh u la pynpaw ka jingsngewnguh bad kitbok kitrwiang ba kine ki nongtrei kin iaid beit iaid ryntih.