Shwa ka ilekshon MDC GHADC, lah ban

Ki nongialam ka seng Congress hapoh ka jylla ki la sdang ban iasyllok na bynta ban bujli noh ia u President ka Meghalaya Pradesh Congress Committee (MPCC) ha kaba bun ki la kwah ban weng noh ia u Bah Vincent H Pala bad ban thung noh da uwei u nongialam bathymmai. Ki tyllong khubor ba la ioh lum ki la iathuh, ba ka jingiakren ka la don hapoh ka seng Congress ban thung noh da u President thymmai bad dei ban weng noh ia u MP barim ka jylla u Bah Vincent Pala uba bat ia ka kam President mynta, namar hapoh ka jingialam jong u ka seng Congress ka la nang tlot bad hiar arsut. “U Bah Pala um shym la jop ia ka ilekshon MLA ba la dep bad kumjuh ha ka ilekshon MP Lok Sabha ruh ula mad ia ka jingshah rem bad ha ka ilekshon MDC ha KHADC bad JHADC um shym la trei eiei kum u President ka Congress, na bynta ban pynkhlain ia ka seng kumta ka Congress kam shym la lah ban jop wat tang uwei u MDC ha ka ilekshon ba dang shu dep” ong ki nongialam ka Congress.

Ki la ong ruh, ban leit dei kiwei kiwei ki nongialam yn ym donkam ban dawa na ki ban hiar shuki noh, hynrei da ka jingshim hi ia ka jingkitkhlieh kila hiar shuki noh na ka kam. Ki la pynpaw ka long ka mat ba kongsan ban ioh ia u nongialam uba thymmai ia ka seng Congress ban sdang ka ilekshon MDC ha Garo Hills Autonomous District Council (GHADC). Ki nongialam Congress ki la ong, ka jinghiar kynsan ka seng Congress ha Meghalaya ka dei namar ka jingbym lah u Bah Pala ban ialam ia ka seng kaba la pynlong ia ki nongialam bad ki MLA ban mih noh na ka seng Congress bad leit pyniasoh noh bad kiwei pat ki seng. Ka mat ba kongsan ban iatai bad iasyllok ban jied ia u nongialam thymmai ka Congress, la ong ki nongialam na bynta ban tehsong ia ki dkhot ba don lypa bad ban iasyllok bad ki nongialam ba la phet noh ba kin wanphai biang sha ka seng ban pynkhlain biang kum ha ki snem mynshwa.

Ki nongialam na rilum Garo ki kham noh mynsiem ia u MP Lok Sabha na Tura u Saleng A Sangma ban shimti kum u President ka Congress khamtam ba don ka ilekshon MDC ha GHADC bad u dei ruh u briew ba lah ban pyniadei bad ki nongialam barim na rilum Garo bad Khasi ban kyrpad ban kin wanphai biang ban pynkhlian ia ka seng Congress. Katba ki nongialam ka Congress na rilum Khasi ki la kyntait bad kam don satia ka jingiakren ban jied President thymmai ka MPCC, hynrei ki la kubur ka seng Congress hapoh ka jingialam u Bah Pala ka la hiar arsut. Ia mynta ka jingiakren ka long hapdeng ki nongialam bad ki nongkitkam bad ka por kan poi kin pyntip ne dawa na ka All India Congress Committee (AICC) ban thung u President thymmai ka MPCC.