Pynbna u Gadkari ban shna surok Tura Bypass ha jinglut ba T.951 klur

U Myntri ka Sorkar Pdeng uba khmih ia ka Ministry of Road Transport & Highways (MoRTH) u Nitin Gadkari, hynne ka sngi, ula pynbna ha ka rynsan Social Media X, ba la mang ia ka bhah tyngka kaba ka T. 951.21 Klur ban shna ia ka surok Tura Bypass, kaban pyniar ia ka jingpyniasoh ia ka surok NH-127B shaduh ka NH-217. “Ha Meghalaya, ngi lah bhah ia ka T.951.27 Klur ban tei ia ka surok Tura Bypass, ka ban pyniar naduh na ka NH-127B shaduh ka NH-217, ban tei ia ka surok 2 Lane kaban long 29.03 Kilomitar ha Tura bad kane ka long kaba kongsan bha” la pynpaw u Gadkari ha ka X.

Ula ong, ka surok NH-217 (ia kaba la tip mynshwa kum ka NH-51) ka ai ka jingshakri kaba kongsan ban pyniasoh ia ka nongbah Guwahati bad ka Dalu, kaba don ha ka thain khappud bad ka ri Bangladesh bad ka treikam kum ka Inland Customs Check-Post. U la bynrap kane ka bypass yn sdang shna najan ka shnong Sanchonggre jong ka surok NH-127B bad kan kut ha ka shnong Jenggitchakgre ha ka surok NH217 bad la pynwandur ia ka ban kiar na kaban iaid lyngba ka surok NH-217 kaba iaid lyngba ka pdeng sor kaba khapngiah jong ka Tura, kaba don ia ka surok kaba rit bad ka jingdheng kali kaba jur bha.

U Gadkari ula ong, ba kane ka jingtei ym tang ba kan pyllait na ka jingkhapngiah hapoh Tura hynrei kan kyntiew ruh ia ka jingshngain jongki paidbah kiba iaid lyngba katei ka surok ha ka leit ka wan ka jongki.