Byrngem ujor ka Dorbar Khliehshnong Sohra ban plie ïa ka Ayush Hospital

Ka Dorbar shnong Khliehshnong, Sohra ka la byrthen ba kan ujor sha Iing Kashari ka Khasi Hills Autonomous District Council (KHADC), lada ka tnad ka koit ka khiah ka plie ia ka Hospital ‘Ayush 50 Bedded Hospital’ khlem pat lah ban pyndep ia ka jingiateh kular ba la iasoi bad ka Dorbar shnong. Ka Dorbar shnong Khliehshnong, Sohra ka la pynpaw ia ka jingsngewsih halor ka jingbym bat ka tnad ka koit ka khiah ia ka jingiateh kular ba la iasoi bad ka shnong halor ka jaka sumar ka Ayush 50 Bedded Hospital.  “Ka long kaba sngewsih ba ka tnad ka koit ka khiah kam burom ia ka kular ba la ia soi bad haduh mynta kam ai ia ka thup kyrteng ki samla na shnong ki ban ioh kam ioh jam ha katei ka Hospital wat hadien ba la buh ia ka jingtyrwa,” la ong u Dr Shembhalang Kharwanlang u Rangbah shnong ka Khliehshnong, Sohra. U bah Shembhalang Kharwanlang ula ong ba hadien ba ka shnong ka ioh sngew ba ka tnad ka mut ban plie noh ia kane ka Hospital khlem da kynjoh ktien ia ka Dorbar shnong, mar mar ki la hiar ban jurip ia katei ka Hospital bad la lap ba ki nongtrei ki la don bad kaba sah ka long tang ban plie noh.

“Ka Dorbar Shnong Khliehshnong Sohra, ka la pynpaw shai kdar, ba lada ka sorkar lyngba ka tnad ka koit ka khiah, kam pat pynurlong lut ia baroh ki Jutang kumba la iateh naduh ba sdang, kam banse ban leit tied jingkhang sha ka iingshari jong ka Khasi Hills Autonomous District Council,” ong u Rangbah shnong. U Rangbah shnong ka Khliehshnong Sohra ula ong ba nalor kane, ha ka jingjurip ka shnong ka la lap ruh ba kane ka Hospital kam pat pynbiang ia ki jaka ban bret ia ki jaboh ba mih na ka Hospital, kaba dei katkum ki kyndon jong ka ‘Waste Management Plan & Biomedical Waste Management Plan’. U Dr Shembhalang u la ong ba ka tnad kam ai jingpynshai sha ka Dorbar Shnong ban pynthikna ba ka jingjakhlia kan nym ktah ia ki nongshong shnong bad ki tyllong um bam ha kitei ki bynta. U la ong ba ka jingthmu ban wanrah ia kane ka jaka sumar ha Khliehshnong Sohra, Hima Sohra, ka long na bynta ban pynmyntoi ia ki nongshong shnong jong ki shnong ba kynthup ïa ka thain Sohra bad ki shnong ba marjan.

Katkum ka jingiathuh u Rangbah shnong, ka jaka na bynta ban tei ia kane ka Hospital la sngewbha da ka Dorbar Shnong Khliehshnong, Sohra khlem kano kano ka jingsiew kaba heh lai akar shiteng, hynrei ka la don ruh ka jingiateh jutang hapdeng ka sorkar lyngba ka ophis District Medical Health Officer (DMHO) East Khasi Hills District bad ka Dorbar Shnong Khliehshnong Sohra.Kumba ka long mynta, ka jingtei ia kane ka hospital ka la dep lut bad ki tiar ki tar kynthup naduh ki Dawai dashin ruh la sdang pynpoi, ha kaba la don ruh ki Doctor bad nongtrei kiba la sdang ban pynbit pynbiang bad pynbeit ia ki tiar ki tar, kum ki jingthiah, ki shuki ki miej bad kiwei kiwei.Hynrei na ka liang ka Dorbar Shnong, ka sah haka lyngngoh, namar watla ki dak ki shin, ki paw shai ba kane ka hospital kala jan sdang treikam bad sa tang ban plie noh, katba ka tnad ka koit ka khiah jong ka sorkar, haduh mynta kam pat pyndep lut ia ki jutang kumba la iakut naduh ba sdang.