Bitar ki shnong ka thaiñ Upper Shillong ba slem pyndep ia ka surok Shillong-Dawki

Ki bor District ka East Khasi Hills haka jingdonlang ki ophisar jong ka tnat PHE, Traffic Police, NHIDCL bad ki nongialam ka Synjuk Ki Nongsynshar Shnong Upper Shillong (SNSUP) hynne ka sngi ki la pynlong ka jingjurip ia ka surok naduh Jingkieng Umshyrpi shaduh 3 Mer. Kane ka jingleit jurip ka dei hadien ba ka SNSUL kala ujor sha ka Deputy Commissioner (DC) ka East Khasi Hills halor ka jingsuki palat ban pyntrei ia ka surok 4 Lane kaba la wanrah ka jingdheng kali kaba jur haka thain. Haba kren bad ki lad pathai khubor u Adviser ka Synjuk Nongsynshar Shnong Upper Shillong Bah Daniel Thangkhiew u la pyntip ba ha ka jingjurip ki la pynpaw ha ki heh ka NHIDCL ia ka jingsuki ka jingtrei bad ruh ia kiba bun ki mat kiba la ktah pat ia ka leit ka wan jong ki paidbah.

U Bah Daniel u la iathuh ba ha ka jingiakren bad ki Ophisar ka NHIDCL, ka Synjuk ka la kyntu ban pynsted iaki kam ban pyndep ia ka surok namar kane kala wanrah ka jingdheng kali kaba jur ha kane ka thain. U la ong baka Synjuk kala pynpaw haka NHIDCL ba ki shnong ki long kiba la kloi ban iatreilang khnang ban pynsted ia ki kam namar kane ka surok kam dei tang ia ki paidbah ka thain Upper Shillong hynrei wat ia ka thain West Khasi Hills, South West Khasi Hills, Sohra, Pynursla bad ka thain Garo Hills. “Ngi la dep ban pynpaw ba ka jingpyntrei ka suki palat bad na ka liang jong ki heh ka NHIDCL ruh ki kubur ia kata. Kumta ngi la kyntu ba kin pynstet namar kane ka dei ka surok bah bad ka la mih ruh ka dheng kali kaba jur bha tang na ka bynta kane” la ong u Bah Daniel.

Naka liang u BDO ka Mylliem Block u Bah Toshanbha Marwein u la kubur baka jingpyntrei ka long kaba suki kaba la ktah iaka iaid ka ieng ki paidbah baroh. Na ka liang ka Synjuk ka la pynpaw ba ki long kiba kloi ban ai ka ingiatreilang bad ka kompeni ba pyntrei na ka bynta ka jingiaid beit bad iaid stet ka kam khnang ba ki paidbah kin ym mad shuh ia ka jingsahkut blok da ki kynta.