Pynkhih mynsiem ka Groundbreakers, T.50 hajar ïoh ka 14-8 kolej ha ka sngi plie dap 10 snem

Ka Khadsawphra College Mairang, kawei na ki College kaba paw bha ha Eastern West Khasi Hills District ha ka 20 tarik u Jylliew 2025 ka la plie ïa ka jingrakhe dap 10 snem jong ka jingiaid lynti ka Higher Secondary School ban tbeh ïa ka sharak jong ka jingnang jingstad sha ki samla pule ka dong ka thain naduh ba la seng ïa ka ha u snem 2015.

Ïa kane ka Opening Ceremony jong ka jingdap 10 snem ka Higher Secondary la wan ban plie da u Bah F.R Kharkongor(IAS), uba dei u Principal Secretary ka tnat Arts and Culture ka sorkar Jylla ha ka jingdonlang u Director ka MBOSE u bah Makdonal Marbaniang, u Bah Ransom Sutnga uba la long kum kongsan ha ka session kaba ar, u bah L. Marthong ADC ka Eastern West Khasi Hills District, u Principal ka 14-8 College, u Dr. Boldness Lyngdoh Nongum, ki Pastor, ki Sordar ka thain, ki samla pule ka College nalor kiwei kiwei kiba la shahkhot sngewbha.

Ha kane ka sngi, ka College kala pynkup burom ruh ïaki nonghikai kiba nyngkong eh jong ka College kiba la don bynta naduh bala seng ïaka Higher Secondary ha u snem 2015 bad haka juh ka por la sam ruh ïa ka Kitdor Memorial Award sha ïa ki arngut ki samla pule ka College kiba la pass bha ha ki Examin ba la dep.

La pynishongkun ïa ka program ha kane ka sngi da ka Musical Play ba la ai kyrteng ‘The Groundbreakers’. Ïa kane Musical Play la pynwan dur ïa ka khana u Kyllang bad u symper, ka Ïam bad ka Ngot bad ka Khoh Ramhah. Kum ka jingpynshlur ban kyntiew shuh shuh ïa kum kine ki musical play, u bah Ranson Sutnga ula noh synniang 50 hajar tyngka sha ka College.

U bah F.R. Kharkongor haba kren ha ka jingïalang ula kyrkhu kyrdoh ïa ka college, ba U Blei un nang iai don ryngkat bad ka College khamtam ia ki samla pule, ba nangne shakhmat kin long ki atiar ban tbeh ïa ka jingshai ha ka Jylla.