Shah kem 3 ngut kynthup ka kynthei ba suba donkti ban pajut sohshkor ia ka khynnah skul

i pulit ka Mawlai Police Station hynne ka sngi ki la kem kawei ka khynnah kynthei bad 2 ngut ki samla shynrang ba la suba donkti ban pajut sohskhor ia ka khynnah skul ha thain Mawlai, Shillong.Katkum ka kyrwoh na u Superintendent Police, East Khasi Hills u Bah Vivek Syiem ula iathuh ki pulit ka Mawlai ki la kem ia 3 ngut ki samla ba la ithuh kyrteng u bah Mabanker Jyrwa 23 snem na Jaiaw Lansonalane bad u Charles Myrthong 20 snem na Riatsamthiah kynthup kawei ka kynthei ba dang 16 snem. Ula iathuh ia kitei sohskhor ba la tuh na ka khynnah skul la ioh kurup na dukan New Oscar Jewellers Shop, hadien ka jingtohkit ia katei ka khynnah kynthei bad ka la ialam sha ka dukan New Oscar Jewellers Shop bad ki pulit ki kurup noh ia kitei ki mar tuh.

Ki pulit ki dang pynlong ia ka jingtohkit ia kitei ki lai ngut ba shah kem ban lap ia kiwei pat kiba donkti ha katei ka kam tuh. La iathuh ki pulit ki la ioh 2 tylli ki jingujor ejahar halor kane ka jingjia shah pajut sohskhor ka khynnah kynthei ha ki runar. U bah Bah Vivek ula iathuh ki pulit ki la ioh kawei ka ejahar na ka Kong Elinda Marbaniang ba sah ha Mawlai Nongkwar ha ka 18 tarik u Jylliew por 1:30 baje mynsngi, katba ka khun jong ka ba dang don 9 snem ka rta, ka la wan na skul, kawei ka kynthei ka la bud na dien na ka lynti iaid kjat ha Wahumkhrah bad ka la kylli ia ka khun jong ka, la ka ithuh ia u Adrian ba pule ha ka Klas II bad la jubab ba kam ithuh. Kane ka kynthei ka la bud haduh ha Mawlai Nongkwar Block-2 bad ka la loit ki sohskhor ka khynnah bad phet bak na katei ka jaka.

Kumjuh ha ka 20 tarik u Jylliew, ka Kong Sumardiam Kharlukhi na Mawlai Nonglum, ka la ujor ejahar ha ki pulit ba ha ka 20 tarik u Jylliew ha ka por kumba 4 baje- 4:30 mynsngi, ki la don 3 ngut ki briew ki bym lah ban ithuh ba kynthup kawei ka kynthei bad 2 ngut ki shynrang ki la wan sha ka iing jong ka katba ka khun kynthei ba dang 9 snem ka dang ialehkai shabar. Katei ka kynthei ka la ot jubor ia ka sohshkor bad ka la phet bak noh na katei ka jaka. U SP ula ong kine ki jingjia ki dei bad ka Mawlai PS Case No 61(6)2025 U/s 304(2)/115(2)/351(2) BNS bad ka Mawlai PS Case No 62(6)2025 U/s 304(2)/3(5) BNS.